Ырлар 42 - Ыдыктыг Библия

¹ Бурганым, меңээ чөптүг шиитпириң үндүрүп көр, Сеңээ шынчы эвес чон-биле чаргымга мээң таламда бол, нүгүлдүг, бак кижиден адырып көр.

² Күш-шыдалым Сенде болгай, Бурганым. Чүге менден ойталадың? Дайзыннарга базындырып, хомудалдан човууртап чоруур ужурум чүл?

³ Бодуңнуң чырыың биле алыс шының чорудуп бер: олар меңээ орук айтып, Сээң ыдык дааңдыва, Сээң чурттап турар черлериңче чедирзиннер.

⁴ Бурганга өргүл салыр бедигээшче, өөрүшкү-хөгнү меңээ берип чоруур Бурганче чеде берейн; чадаганга Сени алгап-мактаайн, о Бурган, мээң Бурганым!

⁵ Сеткил-хөңнүм чүге ундарап турары ол? Чүге дүүреп-хөлзээри ол? Бурганга идегээйн, Камгалакчы Бурганымны ам-даа мактап чоруур дээн мен.