Ырлар 4 - Ыдыктыг Библия

1 Хөгжүм башкарыкчызынга . Хылдыг хөгжүм үдээр. Мизмор-ыр. Давидтии.

¹ Хөгжүм башкарыкчызынга. Хылдыг хөгжүм үдээр. Мизмор-ыр. Давидтии.

² Мээң шынныымны көргүзүп турар Бурган, кыйгырарымга, мени дыңна; кызагдадып турумда, Сен мени адырып каар сен; менче ээ көрнүп, мөргүлүм дыңна даан.

³ Кижи амытан! Кажанга дээр мээң ат-алдарымны баксырадыр силер? Хоозун чугаага ынак бооп, мегеже чүткүүр-дүр силер. Сэла

⁴ Дээрги-Чаяакчы Аңаа бердинген кижини аңгылап алганын билип алыңар; мен Дээрги-Чаяакчыны кыйгырарымга, Ол дыңнап турар.

⁵ Сүртеп сирилеңер, бачыт үүлгетпеңер: орун-дөжээңерге чыткаш, сагыжыңар сайгара боданып, оожургап алыңар. Сэла

⁶ Дээрги-Чаяакчыга шын өргүлдерден салыңар, Аңаа идегеңер.

⁷ «Кым биске ачы-буян көргүзерил? Дээрги-Чаяакчы, чырыткылыг арныңны бисче угландырып көр!» – деп турар улус-ла хөй.

⁸ А Сен мээң чүрээмни ындыг улустуң аъш-чем, арага-дары көвүдээн дээш өөрүшкүзүнден артык улуг өөрүшкү-биле бүргедиң.

⁹ Тайбың удуп чыдып алгаш, амыр дораан удуп каар мен; Дээрги-Чаяакчы, айыыл чок амыдыраар арганы чүгле Сен меңээ бээр-дир сен.