Ырлар 25 - Ыдыктыг Библия

Давидтии.

¹ Дээрги-Чаяакчы, чөптүг шиитпириң үндүрүп көр – кем-буруу чок чурттап чордум, Сеңээ идегээш, тендиш дивес мен.

² Мени шылгап көр, Дээрги-Чаяакчы, мени шенеп, ишти-хөңнүм биле чүрээмни арыглап көр.

³ Сээң энерелиң дугайында үргүлчү бодап чор мен, Сээң алыс шыныңны эдерип чор мен.

⁴ Мегелеп чугаалаар улус-биле кады олурбадым, ийи арынныг улус-биле кады чорбас мен;

⁵ кара сагыштыг улустуң бөлүглежилгезинге хөңнүм чок, бузуттуглар аразынче кирбес мен.

⁶ Кем-буруу чок болгаш, холдарым чуп, Сеңээ өргүл салыр бедигээшти дескинер мен, Дээрги-Чаяакчы –

⁷ Сени алгап-мактаан үнүм дыңналып, Сээң хамык ажыл-херектериңни медээлээйн.

⁸ Дээрги-Чаяакчы, Сээң өргээңге – Сээң чурттап турар өндүр-чаагай оран-саваңга ынак мен.

⁹ Мээң амы-тынымны бачыттыг улус-биле кады, мээң амыдыралымны өлүрүкчүлер-биле кады узуткава;

¹⁰ оларның холдары бузутка борашкан, оларның холдарын хээли долган.

¹¹ А мен кем-буруу чок чурттап чор мен; мени камгалап, ээ көрнүп көр.

¹² Мээң будум дорт орукта турар, Дээрги-Чаяакчының улузунуң чыылган черинге Ону алгап-йөрээр мен.