Ырлар 23 - Ыдыктыг Библия

Давидтии. Мизмор-ыр.

¹ Чер-делегей болгаш ону долган бүгү чүве, өртемчей болгаш ында чурттаан бүгү амытаннар Дээрги-Чаяакчыга хамааржыр;

² Ол чер-делегейниң үндезиннерин далай, сугларга быжыглап каан.

³ Дээрги-Чаяакчының даанче кым үнүп болурул, Ооң ыдыктыг черинге кым туруп болурул?

⁴ Арыг холдарлыг, актыг чүректиг, хей черге даңгырак бербээн, меге аазаашкын кылбаан кижи ол-дур.

⁵ Шак ол кижи Дээрги-Чаяакчының ачы-буянын алыр, бодунуң Камгалакчызы Бургандан чөптүг шаңналды алыр.

⁶ Дээрги-Чаяакчыже чүткээн, Израильдиң Бурганы Сени эдериксээн улус ындыг боор-дур. Сэла

⁷ Хаалгалар, бажыңар көдүрүңер, үе-дүптеги эжиктер, ажыттынып көдүрлүңер – алдарлыг Хаан кирип келзин!

⁸ Ол алдарлыг Хаан кымыл? – Күчү-күштүг, мөге-шыырак Дээрги-Чаяакчы ол-дур, чаа-дайынга күжүн көргүзер Дээрги-Чаяакчы ол-дур.

⁹ Хаалгалар, бажыңар көдүрүңер, үе-дүптеги эжиктер, ажыттынып көдүрлүңер – алдарлыг Хаан кирип келзин!

¹⁰ Шак ол алдарлыг Хаан кымыл? Аг-шериглиг Дээрги-Чаяакчы – алдарлыг Хаан ол-дур! Сэла