Ырлар 22 - Ыдыктыг Библия

Мизмор-ыр. Давидтии.

¹ Дээрги-Чаяакчы – мээң Кадарчым. Мээң хереглээн бүгү чүвем бар.

² Ол мени оът-сигени хөлбең ногаан шынааларга одарладыр, оожум сугларга чедире бээр,

³ сеткилимге чаа күштү хайырлаар. Ол мени Бодунуң ат-алдары дээш шынныг оруктар-биле эдертип бар чыдар.

⁴ Дүмбей караңгы шынаа таварты эртип бар чытсымза-даа, айыыл-халаптан кортпас мен – Сен мээң-биле болгай сен, даянгыыжың биле шыкпыыжың мени камгалап, оожургадыр.

⁵ Дайзыннарым көрүп турда, Сен меңээ дой кылдың, бажымны олива үзү-биле хүндүлеп чаап бердиң, мээң кежиим аяа чык долу-дур!

⁶ Буян биле энерелиң бүгү чуртталгамда мени үдеп чоруур – Сээң өргээңге кезээде туруп аар мен, Дээрги-Чаяакчы.