Ырлар 21 - Ыдыктыг Библия

¹ Хөгжүм башкарыкчызынга. «Даң хаяазының ивизи» деп аялга үдээр. Мизмор-ыр. Давидтии.

² Мээң Бурганым! Мээң Бурганым! Чүү дээш мени кааптың? Сен мени камгалаарын көңгүс бодавайн тур сен, мээң дуза дилээн кыйгымдан ырак-тыр сен.

³ Бурганым! Хүндүс Сени кыйгырып тур мен – а Сен харыы бербейн тур сен; дүне база оожургал чок болу бердим.

⁴ А Сен – Ыдыктыг Чагырыкчы сен, израиль чон Сени мактап турар.

⁵ Ада-өгбелеривис Сеңээ идегеп, ынанып чорааннар, а Сен оларны кадагалап келдиң.

⁶ Олар Сени кыйгырып турганнар – камгалалды ап-даа келгеннер; Сеңээ ынанып чорааннар, идегели хоозун болбаан.

⁷ А мен – кижи эвес, курт-тур мен, улуска бак сөгледип, чонга дора көрдүрүп чор мен.

^8-9 Көрүп турар бүгү улус мени аксы-биле дузап, баштарын чайып: «Ол кижи Дээрги-Чаяакчыга ынанып турду. Ынчангаш ол Дээрги-Чаяакчыга эргим болза, Ол аңаа болчуп, камгалазын» – деп кочулап турду.

¹⁰ А Сен – мени хырын иштинден ужулгаш, меңээ айыыл чок болур кылдыр иемниң хоюнга салып каан Бурган сен.

¹¹ Төрүттүнүп кээримге-ле, мени Сеңээ тураскаадып берипкен, иемден төрүттүнгенимден-не Сен – мээң Бурганым сен.

¹² Менден ыравайн көр – айыыл-халап чоокшулап кел чыдыр, а меңээ дуза кадар кижи чок-тур.

¹³ Хөй дайзыннар мени бүзээледи, Васанның күштүг бугалары дег, үглеп келди;

¹⁴ олар менче, олчазын үзе-чаза соп, ырланган арзылаң дег, диштерин шаарартып тур.

¹⁵ Сеткил-сагыжым суг дег ага берди, шупту сөөктерим кадырылды; чүрээм чук дег чымчай бергеш, иштимге кээп эсти берди.

¹⁶ Өрттедип турар дой саваның суу дег, күш-шыдалым соглуп кагды, өгүмге дылым чыпшына берди, Сен мени, өлүп калзын дээш, довуракче октаптың.

¹⁷ Бак хейлер мени ыттар дег бүзээлеп, мөөңү-биле үглеп келген, хол-будумну үзе-чаза соп каапкан.

¹⁸ Дөрт сөөк кижи апардым, а дайзыннарым менче кайгап, топтап көрүп тур.

¹⁹ Хептеримни аразында үлежип ап, хөйлеңим алыр дээш үлүг тыртып турлар.

²⁰ А Сен, Дээрги-Чаяакчы, менден ыравайн көр, мээң күчүм-дүр сен, дузалаар дээш далажып көр!

²¹ Амы-тынымны хылыштан камгала, дың чаңгыс тынымны ол ыттардан камгала;

²² арзылаң аксындан, үзер бугалар мыйыстарындан мени чайлат, меңээ харыылап көр.

²³ Сээң адыңны ха-дуңма чонумга медээлээр мен, чыыш мурнунга Сени алгап-мактаар мен.

²⁴ Дээрги-Чаяакчыдан коргар улус, Ону алгап-мактаңар! Иаковтуң бүгү салгалы, Ону алдаржыдыңар, Израильдиң бүгү чону, Оон коргуңар!

²⁵ Дээрги-Чаяакчы түрегдээн кижини тоовайн барбаан, ооң дилээн херексевейн барбаан, оон хая көрүнмээн, а кажан ол Бодун кый дээрге, дыңнап каан.

²⁶ Эңмежок чоннуң чыыжынга Сени мактаан сөстерим Сенден кээр; Сенден коргар улус мурнунга Сеңээ берген даңгырактарым күүседир мен.

²⁷ Түрегдээн күжүрлер аштанып-чемненип, тотсун, Дээрги-Чаяакчыже чүткээн улус Ону алгап-мактазын; силерниң чүректериңер турбайн, кезээ мөңгеде согар болзун!

²⁸ Дээрги-Чаяакчыны сактып келгеш, чер-делегейниң кыдыгларында чурттаан улус Олче эглип кээр, Ооң мурнунга бүгү аймак-чоннар кээп, мөгеер;

²⁹ чүге дээрге чагырга – Ооңуу-дур, чоннарның Чагырыкчызы – Ол-дур.

³⁰ Чер-делегейде күш-шыдалдыг бүгү улус ылаптыы-биле Аңаа мөгеер; довурак-доозун бооп хуулуп бар чыдар, өлүр тынныг бүгү улус Ооң мурнунга сөгүрүүр.

³¹ Келир салгалдар Дээргиге бараан болур, Ооң дугайында салгалдан салгал дамчып медээлээр.

³² Олар келир үеде төрүттүнер улуска Дээрги-Чаяакчының чөптүүн, Ооң кылган ажыл-херектерин чугаалап бээр.