Ырлар 18 - Ыдыктыг Библия

¹ Хөгжүм башкарыкчызынга. Мизмор-ыр. Давидтии.

² Дээрлер Бурганның алдарын медээлеп тур, бопурук кудай-дээр Ооң холдарының ажыл-херектерин тоожуп тур.

³ Хүн дараазында хүнге сөстү дамчыдар, дүн дараазында дүнге билигни ажыдар.

⁴ Оларның үнү дыңналбас, сөзү, чугаазы чок-даа болза,

⁵ үн-чугаазы бүгү чер-делегейге дыңналып эртер, а сөстери өртемчейниң кыдыгларынга чедер. Бурган дээрлерде хүннүң өргээзин тургузуп алган.

⁶ А хүн, күдээ дег, куда соонда хонган өрээлинден үнүп кээр, эртер оруун төндүр маңнап бар чыда, мөге-шыырак кижи дег өөрүүр.

⁷ Ол дээрниң бир кыдыындан үнүп келгеш, өске кыдыынга чедир көжүп хүннээр, ооң изиинден чүү-даа чүве чаштынып шыдавас.

⁸ Дээрги-Чаяакчының дүрүм-хоойлузу болбаазыраңгай, сеткил-сагышты тынгарар; Ооң чугаалаан сөстери шынныг, кенен улусту угаан киирер.

⁹ Дээрги-Чаяакчының айтыышкыннары чөптүг, чүректи өөртүр; Ооң чагыы чырыткылыг, карактарны чырыдар.

¹⁰ Дээрги-Чаяакчыдан коргар чорук – арыг база кезээ мөңгеде артар. Дээрги-Чаяакчының шиитпирлери – алыс шынныг, шуптузу чөптүг;

¹¹ олар алдындан – аажок хөй арыг алдындан күзенчиг, ары өөнден алган ары чигиринден амданныг.

¹² Сээң чалчаң ол бүгүден өөредигни алыр, оларны сагыыры – өндүр улуг шаңналды эккээр.

¹³ Частырыгларын эскерип шыдаар кижи бар бе? Бодумнуң ожаап билбээним бачыттарымдан мени арыгла.

¹⁴ Сагыштыы-биле үүлгеткен бачыттардан база Бодуңнуң чалчаңны чайладып көр – олар мени чагырбазын. Мен ынчан актыг апарып, аажок улуг кемниг херек дээш буруудавас мен.

¹⁵ Дээрги-Чаяакчы – чалым-хаям сен, Камгалакчым сен! Мээң аксымдан үнген сөстер биле чүрээмниң бодалдары Сеңээ таарымчалыг болзун.