Ырлар 149 - Ыдыктыг Библия

¹ Аллилуйя! Дээрги-Чаяакчыга чаа ырдан ырлап бериңер, Аңаа бердинген улустуң чыыжынга Ону алгап ырлаңар.

² Израиль чон бодунуң Чаяакчызы дээш өөрүп-хөглезин, Сионнуң улузу боттарының Хааны дээш өөрүп-байырлазын.

³ Ооң адын самнавышаан алгап-мактазын, тимпан биле чадаганга үдеттирип, алгап ырлазын.

⁴ Дээрги-Чаяакчының сеткили Бодунуң чону дээш ханган болгай, Ол томаараан улусту, тиилелге хайырлап, каастаар.

⁵ Бурганга бердинген улус алдаржып, өөрүп-байырлазын, орун-дөжээнге-даа чыткаш, өөрүп ырлазын.

⁶ Оларның аксы-сөзү Бурганны алгап-йөрээзин; а холдарынга аажок чидиг хылыш туттунзун –

⁷ олар өске чоннардан өжээн негезин, өске аймактарны кезетсин;

⁸ оларның хааннарын хүлүп-бектезин, нояннарын демирлеп-кинчилезин –

⁹ бижиттинген шииткелди оларга онааштырзын. Ынчаар кылыр болза, Аңаа бердинген улус алдаржыыр. Аллилуйя!