Ырлар 144 - Ыдыктыг Библия

Макталдың ыры. Давидтии.

¹ Бурганым болгаш Хааным, Сени кымдан арттыр мактаар мен, Сээң адыңны кезээ мөңгеде алгап-йөрээр мен. ב (бет)

² Хүннүң-не Сени алгап-йөрээр мен, кезээ мөңгеде Сээң адыңны алгап-мактаар мен. ג (гимел)

³ Дээрги-Чаяакчы өндүр улуг, алдар-макталга дыка төлептиг. Ооң өндүр бедиин билип аары болдунмас. ד (далет)

⁴ Салгалдан салгал дамчый улус Сээң ажыл-херектериңни алгап-мактаар база Сээң күчү-күжүңнү медээлээр. ה (хе)

⁵ Олар Сээң өндүр бедик ат-алдарыңны медээлээр, мен база Сээң кайгамчык ажыл-херектериңни угаап бодаар мен. ו (вав)

⁶ Улус Сээң сүртенчиг ажыл-херектериңниң күчү-күжүн чугаалажы бээр, мен база Сээң өндүр бедииңни чарлап чугаалаар мен. ז (зайин)

⁷ Улус Сээң буянныыңның элбээн үргүлчү алдаржыдып чугаалай бээр, Сээң чөптүүңнү алгап ырлай бээр. ח (хет)

⁸ Дээрги-Чаяакчы килеңнээчел эвес, кээргээчел, ээ көрнүүчел болгаш элбек энерелдиг. ט (тет)

⁹ Дээрги-Чаяакчы бүгү улуска буянныг, Ооң чаяаганы бүгү чүүлдерге ээ-хайыралы илереп кээр. י (йод)

¹⁰ Дээрги-Чаяакчы, чаяалгаң шуптузу Сени алдаржытсын, Сеңээ бердинген улус Сени алгап-йөрээзин, כ (каф)

¹¹ Сээң Чагыргаңның алдарын суртаалдазын, Сээң күчү-күжүңнү дамчыдып чугаалазын. ל (ламед)

¹² Кижи төрелгетен олардан Сээң күчү-күжүң дугайында база Сээң Чагыргаңның алдарлыг өндүр бедииниң дугайында билип алзын. מ (мем)

¹³ Сээң Чагыргаң кезээ мөңгеде турар, кижи төрелгетенниң бүгү салгалдарын хааннаар сен. נ (нун) Дээрги-Чаяакчының чугаалааны бүгү сөстерге бүзүреп боор, Ол Бодунуң чаяап кааны бүгү чүүлдеринге энерелдиг. ס (самех)

¹⁴ Кээп ужуп чыдар бүгү улуска Дээрги-Чаяакчы чөленгииш болур, бүшкүйтүр бастырган бүгү улусту дорттай хөндүрер. ע (айин)

¹⁵ Бүгү улустуң карактары Сенче ынаныштыг көөр, Сен оларга аъш-чемни чогуур өйүнде бээр сен: פ (пе)

¹⁶ холуңну чада сунгаш, бүгү амылыгларның күзээн чүвезин хандырып, оларны тоттурар сен. צ (цаде)

¹⁷ Дээрги-Чаяакчы Бодунуң бүгү оруктарынга чөптүг, Бодунуң бүгү ажыл-херектеринге энерелдиг. ק (коф)

¹⁸ Дээрги-Чаяакчы Ону кый деп мөргүүр бүгү улуска – шынныы-биле Ону кый деп мөргүүрлерге – чоок. ר (реш)

¹⁹ Оон коргар улустуң күзээн чүүлүн Ол күүседип бээр, оларның дуза дилээн кыйгызын дыңнап кааш, камгалаар. ש (шин)

²⁰ Дээрги-Чаяакчы Аңаа ынак бүгү улусту карактап-кадагалаар, а бузуттуг шупту улусту узуткап каар. ת (тав)

²¹ Мээң аксы-сөзүм Дээрги-Чаяакчыны мактазын, бүгү амылыглар Ооң ыдыктыг адын кезээ мөңгеде алгап-йөрээзин.