Ырлар 142 - Ыдыктыг Библия

Мизмор-ыр. Давидтии.

¹ Дээрги-Чаяакчы, мөргүлүмнү дыңна, чалынган үнүмнү кичээнгейге ал, шынчың база чөптүүң ёзугаар меңээ харыыла;

² мээң-биле чаргы-чаалы кылбайн көр – Сээң мурнуңга кандыг-даа кижи актыг бооп шыдавас!

³ Дайзын мени истеп-сүрүп, черге чыпшыр таптай базып, үе-дүпте өлген улус дег, караңгыга турарын албадап тур.

⁴ Эр соруум кошкай берди, чүрээм көжүй берди.

⁵ Шагда эрткен үелерни сактып ор мен, Сээң шупту ажыл-херээңни, холдарың-биле кылган ажыл-херээңни бодап ор мен.

⁶ Холдарымны Сенче өрү сундум: кургаан чер сугже дег, сеткилим Сенче чүткүп тур. Сэла

⁷ Дүрген меңээ харыылап көр, Дээрги-Чаяакчы, амы-тыным үстүр деп барды, менден хая көрүнмейн көр, оон башка хөөрже кире берген улуска дөмей апаар мен.

⁸ Эртен эрте энерелдиг харыыңны дыңнаар аргадан бер – идегелим Сенде болгай. Эртер оруумну айтып берем – сеткилимниң ханызындан Сеңээ мөргүп тур мен.

⁹ Дайзыннарымдан мени камгала, Дээрги-Чаяакчы, чаглактаныр черим Сенде болгай.

¹⁰ Күзел-сорууңну күүседиринге өөредип каг, чүге дээрге Бурганым-дыр сен. Ачылыг Сүлдең мени оргу-дески черлеп аппарзын.

¹¹ Бодуңнуң адыңны бодааш, мени амы-тынныг арттырып көр, Дээрги-Чаяакчы, чөптүүң-биле мени айыыл-халаптан адырып көр.

¹² Меңээ энерелдииң-биле дайзыннарымны узуткап каг, мени кызып-кыйган улустуң шуптузун кыргып-хыдып каг – чүге дээрге Сээң чалчаң-дыр мен.