Ырлар 141 - Ыдыктыг Библия

Маскил-ыр. Давидтии. Ооң куйга чаштып турган үезинге хамааржыр мөргүл .

¹ Дээрги-Чаяакчыны ыыткыр кыйгырдым, Дээрги-Чаяакчыга мөргүп, кый дидим;

² Ооң мурнунга хомудал-дилээмни ажыдып бердим, айыыл-халавымны чугаалап бердим.

³ Эр соруум кошкай бээрге;, эртер оруумну Сен билир сен. Чоруп турган оруумга дузак салып каан болду.

⁴ Бодумнуң чанымче көөрүмге, таныш эжим тывылбайн баар-дыр – хоргадаар черим чок апарган-дыр, мен дээш кым-даа сагыш човавайн турар-дыр.

⁵ Дээрги-Чаяакчы, Сенден дуза дилеп алгырып: «Сен – мээң хоргадалым сен, дириглер оранынга чурттаар үлүүм сен» – деп чугааладым.

⁶ Чалынган кыйгымны кичээнгейге ал – аажок куду көрдүрүп чор мен; истеп-сүрген улустан мени камгала – олар менден күштүг-дүр.

⁷ Сээң адыңны мактаар кылдыр, хоругдалдан мени хоста. Сен меңээ буян хайырлаарыңга, чөптүг-шынныг улус мени долгандыр чыглып кээр.