Ырлар 140 - Ыдыктыг Библия

Мизмор-ыр. Давидтии.

¹ Дээрги-Чаяакчы, Сени кыйгырып тур мен: дүрген чедип кел, Сени кый дээн үнүмче кулааңны ээктир.

² Мээң мөргүлүмнү, Сээң мурнуңга айдызаар өргүл дег, хүлээп ал, холумну өрү сунганым – кежээки өргүл дег болзун.

³ Дээрги-Чаяакчы, аксымга таңныылдан тургузуп, аксы-дылымның эжиин кадартып каг;

⁴ мени бак сөстер эдеринче, бузут үүлгедикчилери-биле кады кем-буруулуг херектер кылырынче ээлдирбейн көр, оларның дойларынга киришпээйн.

⁵ Ооң орнунга чөптүг-шынныг кижи мени сопсун – энерел болур; чемелезин – бажымга хора чедирбес эки олива үзү дег болур. А мен бузуттуг улустуң үүлгедиглеринге удур үргүлчү мөргүп чоруур мен.

⁶ Бузуттугларның баштыңчыларын хаядан дүжүр октаптар, бузуттуг улус ынчан мээң сөстеримни дыңнап, таарымчалыг сөстер дээрзин билип каар.

⁷ «Черни чарып, үүрмектеп турары дег, бистиң сөөктеривисти өлүглер оранының аксынче киир тарадыр чажып турар» – дээрлер.

⁸ А мээң карактарым Сенче углай көрүп турар, Дээрги-Чаяакчы, Сенден хоргадал алдым, амы-тынымны үспейн көр!

⁹ Меңээ салган дузактан, бузут үүлгедир улустуң какпаларындан мени чайладып көр.

¹⁰ Бузуттуглар шупту боттарының четкилеринге ораашсын, а мен кыдыы-биле эрте берейн.