Ырлар 139 - Ыдыктыг Библия

¹ Хөгжүм башкарыкчызынга. Мизмор-ыр. Давидтии.

² Дээрги-Чаяакчы, бак кижиден мени камгала, күш дөгээр улустан мени кадагала.

³ Олар – чүректеринде кара бодалдарлыг, хүннүң-не чаалажыр чүткүлдүг улус-тур;

⁴ дылдарын, чылан ышкаш, шагарынга мергежидип турар улус-тур, оларның эриннеринде ок-чыланныы дег хоран бар. Сэла

⁵ Дээрги-Чаяакчы, бузуттуг хейниң холун менден чайлат, буттарымны тендиңнедир сагыштыг күш дөгээр улустан мени кадагала.

⁶ Адыыргак улус меңээ дузак чажыра салып каан, бак хейлер оруумга четки чада салып, буттарымга какпа салып каан. Сэла

⁷ Дээрги-Чаяакчыга: «Сен – мээң Бурганым сен, чалынган үнүмнү дыңна» – деп чугааладым.

⁸ Дээрги-Чаяакчы, күчү-күштүг Камгалакчым, Дээргим, тулчуушкун хүнүнде бажымны камгалап турар сен.

⁹ Дээрги-Чаяакчы, бузуттуг улустуң күзээн чүвезин бербе, оларның кара сагыштыг бодалы боттанмазын – оон башка идээргей бээрлер. Сэла

¹⁰ Мени бүзээлээн улустуң тейин оларның бак аксы-сөзү шыва алзын.

¹¹ Оларже оттуг көстер кээп дүшсүн, олар ханы оңгарже киир октадыпкаш, оон үнүп шыдавазын.

¹² Бак аас эдер кижи чер-чүртка быжыы-биле туруп шыдавас болзун, күш дөгээр кижини айыыл-халап аглап-сүрзүн.

¹³ Билир мен: Дээрги-Чаяакчы базындырган улуска шын шииткелди, түреңги улуска чөптүг шииткелди үндүрер.

¹⁴ Ынчангаш чөптүг-шынныг улус Сээң адыңны мактаар, мөзүзү эки улус Сээң хайгааралың адаанга чурттаар.