Ырлар 134 - Ыдыктыг Библия

¹ Аллилуйя! Дээрги-Чаяакчының адын алгап-мактаңар-ла! Дээрги-Чаяакчының чалчалары, Ону алгап-мактаңар!

² Дээрги-Чаяакчының өргээзинде, Бурганывыстың бажыңының мурнунда турар улус,

³ Дээрги-Чаяакчыны буянныы дээш алгап-мактаңар! Ооң тааланчыг адын алгап ырлаңар!

⁴ Дээрги-Чаяакчы Иаковту Бодунга шилип алган, Израильди Бодунуң улуг үнелиг өнчү-хөреңгизи кылдыр шилип алган болгай.

⁵ Дээрги-Чаяакчы өндүр улуг деп, Дээргивис бүгү бурганнардан бедип турар деп билир мен.

⁶ Дээрги-Чаяакчы күзээн-не бүгү чүүлүн дээрлерге-даа, черге-даа, шупту дүп чок далайларга-даа кылып турар.

⁷ Ол булуттарны черниң кыдыг-кызыгаарындан бөлүп эккеп, чаъс чаап турда, чаңныктарны чаяап, Бодунуң шыгжамырындан хатты үндүр хадыдып турар.

⁸ Ол Египетке бүгү дун төлдерни – кижилерниин-даа, мал-маганныын-даа – узуткап каапкан;

⁹ Египет чоннуң аразынга кайгамчык демдектерин көргүзүп, оларны фараон биле ооң бүгү дүжүметтеринге удурланыштыр кылган.

¹⁰ Дээрги-Чаяакчы хөй чоннарны базып каан, күчүлүг хааннарны өлүрүп каан.

¹¹ Амор хаан Сигонну, Васанның хааны Огту болгаш Ханаанның бүгү күрүнелерин узуткап кааш,

¹² оларның черлерин Бодунуң израиль чонунга өнчү кылдыр берипкен.

¹³ Дээрги-Чаяакчы, Сээң адың кезээ мөңгеде артар! Дээрги-Чаяакчы, салгалдан салгал дамчып Сени кым-даа утпас!

¹⁴ Дээрги-Чаяакчы Бодунуң чонун чөптүү-биле шиидер база Бодунуң чалчаларынче ээ көрнүр.

¹⁵ Өске чоннарның дүрзү-бурганнары – алдын биле мөңгүнден бүткен, кижи холу шуткаан чүүлдер-дир.

¹⁶ Ол шуткумалдар аастарлыг-даа болза, чугаалавас; карактарлыг-даа болза, көрбес;

¹⁷ олар кулактарлыг-даа болза, дыңнавас; оларның аастарында амыдыралдың тыныжы чок.

¹⁸ Ындыг дүрзү-бурганнарны кылып турар, оларынга идегээр бүгү улус шак ол дүрзүлеринге дөмейлежи берзин.

¹⁹ Израиль чон, Дээрги-Чаяакчыны алгап-йөрээ! Аароннуң салгалы, Дээрги-Чаяакчыны алгап-йөрээ!

²⁰ Левийниң аймаа, Дээрги-Чаяакчыны алгап-йөрээ! Дээрги-Чаяакчыдан коргар улус, Ону алгап-йөрээңер!

²¹ Иерусалимде оран-савалыг Дээрги-Чаяакчы Сионга алгаттырып-йөрээттирзин! Аллилуйя!