Ырлар 114 - Ыдыктыг Библия

¹ Дээрги-Чаяакчыга ынак-тыр мен: Ол мээң мөргүл кылган үнүмнү дыңнап кагды,

² Бодунуң кулаан менче ээктирди; назыным дургузунда Ону кыйгырар мен.

³ Өлүмнүң дузаа мени боой тудуп алды, өлүглер оранының какпазы мени хап алды, кызагдаашкын биле айыыл-халапка алыстым.

⁴ Мен ынчан Дээрги-Чаяакчының адын адап, диледим: «О, Дээрги-Чаяакчы, мени адырып көр!»

⁵ Дээрги-Чаяакчы ээ көрнүүчел, чөптүг, Бурганывыс ээ-хайыралдыг.

⁶ Дээрги-Чаяакчы бөдүүн улусту кадагалаар – мен түрей бээримге, Ол камгалады.

⁷ Сеткил-сагыжым амыр-дышка бүргетсин, Дээрги-Чаяакчы меңээ буянын хайырлаан-дыр.

⁸ Дээрги-Чаяакчы, Сен мени өлүмден, карактарымны – ыглаарындан, буттарымны – тептигип кээп дүжеринден чайлаткан сен.

⁹ Дириглер оранынга Дээрги-Чаяакчыга дыңнангыр амыдыраар мен.