Ырлар 110 - Ыдыктыг Библия

¹ Аллилуйя! א Мөзүзү эки улустуң ниитилел-чыыжынга ב бүгү-ле чүлдү-чүрээм-биле Дээрги-Чаяакчыны алдаржыдып тур мен! ג

² Дээрги-Чаяакчының ажыл-херектери өндүр улуг, ד оларга ынак бүгү улуска билип алыксанчыг. ה

³ Ооң ажыл-херээ – чайынналчак алдар-макталдыг; ו Ооң чөптүү кезээ мөңгеде артып каар. ז

⁴ Дээрги-Чаяакчы Бодунуң кайгамчык чүүлдерин уттундурбас кылып кагды; ח Ол кээргээчел болгаш ээ көрнүүчел-дир. ט

⁵ Оон коргар улуска аъш-чемни Ол берип турар-дыр, י Бодунуң чагыг-керээзин кезээ мөңгеде утпас-тыр. כ

⁶ Ол Бодунуң чонунга өске чоннарның ээлээн черин берип, ל ажыл-херектериниң күчү-күштүүн ооң-биле көргүстү. מ

⁷ Ооң холдарының ажыл-херектери – алыс шынныг болгаш чөптүг; נ Ооң бүгү чагыгларынга идегеп болур – ס

⁸ олар кезээ мөңгеде доктааттынган, ע алыс шын болгаш чөптүг чорук-биле тургустунган. פ

⁹ Ол Бодунуң чонунга хосталыышкынны хайырлаан, צ Бодунуң чагыг-керээзин кезээ мөңгеде берип каан; ק Ооң ады ыдыктыг болгаш сүрээденчиг. ר

¹⁰ Дээрги-Чаяакчыдан коргары – мерген угаанның үнер дөзү. ש Ооң чагыгларын күүседип турар бүгү улус чарт угаанныг. ת Дээрги-Чаяакчыга мактал кезээ мөңгеде артар.