Ырлар 11 - Ыдыктыг Библия

¹ Хөгжүм башкарыкчызынга. Сес хылдыг хөгжүм херексели үдээр. Мизмор-ыр. Давидтии.

² Дээрги-Чаяакчы, камгала! Сеңээ бердинген кижи артпаан-дыр, кижи төрелгетенниң иштинде бүзүреп болгу дег улус чок-тур.

³ Кижи бүрүзү өске кижиге мегелеп чугаалап турар, олар баажыланган чүрээнден авыяас дылдары-биле авыяастап чугаалажыр.

⁴ Авыяас, турамык дылдарның шуптузун Дээрги-Чаяакчы тура соп каапсын.

⁵ Ол улус: «Аксы-сөзүвүс-биле ажып тиилээр бис, дылдарывыс бисти деткип турда, кым биске дээрги боорул?» – дижип турар.

⁶ А Дээрги-Чаяакчы: «Мен ам түреңги улуска – човалаңы дээш, базындырган улуска – уё-човууру дээш болчур мен, Мээң камгалалым алыксаан кижиниң идегелин боттандырып бээр мен» – деп турар.

⁷ Дээрги-Чаяакчының сөстери – арыг сөстер-дир; олар – чеди катап арыглаан, хайылдырар суугуга довурактан аңгылай эзилдирген мөңгүн дег-дир.

⁸ Дээрги-Чаяакчы, Бодуңнуң улузуңну кадагалаар сен, оларны шак ындыг авыяас улустан кезээ мөңгеде камгалаар сен.

⁹ Кижи төрелгетенниң иштинде эң бак чүүл үнеледи бээрге, бузуттуг хейлер кайда-даа чоруп турар апарды.