Ырлар 108 - Ыдыктыг Библия

Хөгжүм башкарыкчызынга. Давидтии. Мизмор-ыр.

¹ Алгап мактап турар Бурганым, ыыт чок барба!

² Бузуттуглар, нүгүлчүлер аксы-дылын менче кызаңнадып, мээң-биле мегелеп чугаалажып турлар;

³ көөр хөңнү чок сөстери-биле бүзээлеп, чылдагаан чок черге мээң-биле дайылдажып турлар.

⁴ Оларга ынак-даа болзумза, меңээ удурланып турлар, а мен мөргүп тур мен.

⁵ Буянымга бузут-биле, ынак сеткилимге – көөр хөөн чок чорук-биле харыылап турлар.

⁶ Дайзынымны бузуду дээш кезедип көрем, удурланыкчызы аңаа удур херечилезин.

⁷ Шииткел черинге дайзыным буруудап үнзүн, ооң мөргүлүн безин бачыт кылдыр саназын.

⁸ Ооң назы-хары кызырылзын, өске кижи ооң эрге-дужаалын эдилезин.

⁹ Дайзынымның ажы-төлү адазы чок артсын, алган кадайы дулгуяк апарзын.

¹⁰ Уруг-дарыы аал-оранының бузундуларын каггаш, диленип, улчузун.

¹¹ Ооң бүгү өнчү-хөреңгизин чээли кылган улус былаап алзын, ажыл-ижиниң үре-түңнелин өске улус үптеп алзын.

¹² Аңаа ээ-хайыралыг кижи тывылбазын, ажы-төлүн кээргеп көөр кижи турбазын.

¹³ Үре-салгалының хуу-салымы – өлүм болзун; дараазында салгалга оларның ады шуут уттундура берзин.

¹⁴ Дээрги-Чаяакчыга ооң ада-өгбезиниң кем-буруузу уттундурбазын, ооң авазының бачыт-багы өршээттирбезин.

¹⁵ Дээрги-Чаяакчыга оларның бачыттары кезээде көскү болзун, чырык черден оларның дугайында сактыышкынны Ол балап каапсын.

¹⁶ Чүге дээрге мээң дайзыным улуска энерел көргүзерин уткан-дыр, ядыы-түреңги, чүрээ ундараан кижини өлүрерин бодап, истеп-сүрүп турган-дыр.

¹⁷ Дайзыным каргыш салырынга хандыкшаан турду – салган каргыжы дедир ээп келзин; улуска йөрээл салырын күзеведи – алгыш-йөрээл оон ырай берзин.

¹⁸ Каргышты ол, хеп ышкаш, кедип алзын, каргыш, суг дег, иштинче сиңип кирзин, үс дег, эът-кежинче сиңип кирзин.

¹⁹ Каргыш ооң мага-бодун шыпкан хеви дег, үргүлчү куржанып чоруур куру дег апарзын.

²⁰ Ол бүгүнү Дээрги-Чаяакчы меңээ удур бак чүве чугаалап чоруур удурланыкчыларым-биле кылзын.

²¹ А Сен Бодуңнуң адыңны бодап, меңээ буяндан көргүзем, Дээрги-Чаяакчы, Дээргим; Сээң энерелиң ачылыг-дыр. Мени камгала, чүге дээрге

²² чөгенчиг күжүр-дүр мен, чүреккейим качыгдап тур.

²³ Хөлеге дег, чидип бар чыдыр мен, шартылаа-даа дег, сывыртадып чор мен.

²⁴ Шээрленгеш, дискектерим суларады, арып-дорааш, дөрт сөөк болдум.

²⁵ Дайзыннарым мурнунга адым баксырады, мени көргеш, олар баштарын чайып, шоодар-дыр.

²⁶ Дээрги-Чаяакчы, Бурганым, дузалап көр, энерелдииң-биле камгалап көр.

²⁷ Сээң холуң камгалаан деп, Дээрги-Чаяакчы ынчаар кылган-дыр деп, дайзыннарым билип алзын.

²⁸ Олар мени каргап турлар, а Сен – алгап-йөрээп көрем; халдап келген улус бак атка кирзин, а Сээң чалчаң амыразын.

²⁹ Меңээ удурланыр улус бак ат-биле шыптынзын, ыядыын хеп дег кедип алзын.

³⁰ Хөй улус мурнунга Дээрги-Чаяакчыга өөрүп четтирейн, аксы-сөзүм Ону алгап-мактазын.

³¹ Түреңги кижини шиидип турар улустан камгалаар дээш, Ол ооң-биле турар.