Ырлар 103 - Ыдыктыг Библия

¹ Сеткилим Дээрги-Чаяакчыны алгап-йөрээзин! Дээрги-Чаяакчы, Бурганым, канчаар-даа аажок өндүр улуг сен, чайынналчак мактал-хүндү – кеткен хевиң ол-дур.

² Чырык-биле, тон-биле дег, шыптынып алган сен, дээрни, чадырның сери-шывыын дег, чада салган сен.

³ Дээрниң сугларының кырынга үстүкү ордуңну тудуп алган сен, бодуңнуң чуузаңга дег, булуттарга олурупкаш, чалгынныг хатты хөлге кылгаш, халдып турар сен.

⁴ Хаттардан – Бодуңнуң төлээлериңни, чалбыышталган оттан – Бодуңнуң бараан болукчуларыңны кылып аар сен.

⁵ Сен чер-делегейни быжыг үндезинге тургузуп кагдың, ол кажан-даа божаңнавас.

⁶ Ону дүп чок далай-биле, тон-биле дег, шуглап каан турган сен, суг дагларны шыпкан турган.

⁷ Суглар Сээң чемелээн сөзүңден дезип маңнап, Сээң диңмирээн үнүңден хоюп ыңай бооп турган.

⁸ Дагларже үнүп, шынааларже бадып, Сээң оларга айтып бергениң черже агып турган.

⁹ Сен сугларның ажыр акпас кызыгаарын тургузуп кагдың, олар ам черни хөме агар дээш дедир ээп шыдавас.

¹⁰ Сен дамырактарны шынааларже аксып бадырыптың; суглар дагларның аразында агып бадып,

¹¹ шөлдерде шупту аң-меңге суксун болду, черлик элчигеннер суксунун хандырып ап тур.

¹² Суг кыдыында дээрниң куштары чурттай берген, будук-бүрү аразында эдип олурлар.

¹³ Үстүкү ордуңдан дагларны суггарып тур сен, Сээң ажыл-херээңниң үре-түңнели-биле чер-делегей тодуп тур.

¹⁴ Мал-маганга оът-сигенни, кижилерге болбаазырадыр үнүш-дүжүттү өстүрүп: оларның чиир аъш-чемин черден уштуп берип тур сен.

¹⁵ Кижиниң сеткил-хөңнүн хөгледир араганы, арнын кылаңнадыптар олива үзүн, шаг-шинээн быжыглаар тарааны берип тур сен.

¹⁶ Дээрги-Чаяакчының ыяштары – Ооң олуртуп кааны Ливан пөштериниң суксуну ханып тур,

¹⁷ оларга кушкаштар уялар тудуп аар; шивилерге аист куштар уяланыр,

¹⁸ бедик дагларга те-чуңма турумчуур, хая-даштарга сарлык-дегелер хоргадаар.

¹⁹ Дээрги-Чаяакчы үени тодарадыр дээш айны чаяап каан, хүн бодунуң ажар өйүн билир кылып каан.

²⁰ Сен дүмбей караңгыны чаттылдыр салыптарыңга, дүн дүжүп кээр – ол өйде арга-эзимниң аң-меңи чимзенип чоруур,

²¹ арзылаңнар олча дилеп, ырланып, Бургандан аъш-чем дилээр.

²² Хүн үнүп кээрге, аң-мең ээп чанып, үңгүрлеринге, ижээннеринге чыткылап аар.

²³ Кижи амытан ынчан кежээге чедир ажылдаар дээш үнүп келгеш, орайга чедир иженир.

²⁴ Дээрги-Чаяакчы, Сээң ажыл-херектериңниң хөй деп чүвезин! Бүгү чүүлдерни мерген угаанның-биле чаяап каан сен, олар чер-делегейни дола берген!

²⁵ А бо болза өндүр делгем далай-дыр. Мында эмге-тикчок улуг-биче далай амытаннары бар,

²⁶ корабльдар эжиндирип турар; мында аңаа эштип ойназын дээш чаяап кааның левиафан бар.

²⁷ Ол амытаннар шупту «Аъш-чемни чогуур үезинде бээр боор» деп, Сеңээ идегеп турар.

²⁸ Оларга бээриңге, чыып аарлар, холуңну ажыда сунарыңга, ачы-буян-биле пөгүп тодарлар.

²⁹ Олардан хая көрнүр болзуңза, корга бээрлер, амы-тынын үзүп каарыңга, чок апарып, тывылган довураанче дедир кире бээрлер.

³⁰ Бодуңнуң тыныжыңны оларга тындырыптарыңга, чаяаттына бээрлер, Сен чер-делегейни ынчалдыр чаартып турар сен.

³¹ Дээрги-Чаяакчының алдары кезээ мөңгеде турзун. Ол Бодунуң чаяалгалары дээш өөрүзүн.

³² Черже Ол көрүптери билек, чер сирилей бээр, дагларга дээптери билек, олар ышталы бээр.

³³ Дириг чорааш, Дээрги-Чаяакчыны алгап ырлаайн, чурттап чорааш, Бурганымны мактап ырлаайн.

³⁴ Мээң сөстерим Аңаа таарымчалыг болзун; Дээрги-Чаяакчы дээш өөрүп-хөглээйн.

³⁵ А бачыттыг улус чырык чер кырындан арлып чиде берзин, бузуттуг улус моон соңгаар турбазын. Сеткилим Дээрги-Чаяакчыны алгап-йөрээзин! Аллилуйя!