Ырлар 102 - Ыдыктыг Библия

Давидтии.

¹ Сеткилим Дээрги-Чаяакчыны алгап-йөрээзин, бүгү ишти-хөңнүм Ооң ыдыктыг адын алгап-йөрээзин!

² Сеткилим Дээрги-Чаяакчыны алгап-йөрээзин, Ооң хайырлаан хамык ачы-буянын утпазын!

³ Ол мээң шупту кем-буруумну өршээр, хамык аарыымны экиртир;

⁴ амы-тынымны өлүмден адырар, энерел болгаш ээ-хайыралы-биле мени бүргээр;

⁵ амыдыралымны ачы-буян-биле долдурар; эзирнии дег, чалыы назыным чаартынып, эглип кээр.

⁶ Дээрги-Чаяакчы бүгү базындырган улуска чөптүг чорук биле шын шииткелди көргүзер.

⁷ Ол Бодунуң оруктарын Моисейге, ажыл-херектерин – израиль чонга көргүскен.

⁸ Дээрги-Чаяакчы килеңнээчел эвес, кээргээчел, ээ көрнүүчел база элбек энерелдиг;

⁹ Ол бисти үзүк-соксаал чок буруудатпас, кезээ мөңгеде хорадавас.

¹⁰ Ол биске кем-буруувус ёзугаар хамаарылга көргүспеди, бисти бачыттарывыс ёзугаар кезетпеди.

¹¹ Чүге дээрге дээрниң черден бедии дег, Ооң энерели Оон коргар улуска өндүр бедик;

¹² чөөн чүктүң барыын чүктен ырак турары дег, бузуттарывысты Ол бистен ырадып каапты;

¹³ ачазының оолдарынга ээ-хайыралыы дег, Дээрги-Чаяакчы Оон коргар улуска ээ-хайыралыг.

¹⁴ Ол бистиң чүден бүткенивисти билир, довурактан тывылганывысты бодап чоруур.

¹⁵ Кижиниң назыны оът-сиген дег: шөлде чечек дег частып кээр,

¹⁶ а салгын-хат эстедир хадып эртерге, ол чиде бээр, ооң турган чери ону ам танывайн баар.

¹⁷ А Дээрги-Чаяакчының энерели Оон коргар улуска үе-дүптен эгелээш, кезээ мөңгеде артып каар;

¹⁸ Ооң чагыг-керээзин сагып, айтыышкыннарын күүседирин утпайн чоруур улустуң үре-салгалынга Ол чөптүүн көргүзер.

¹⁹ Дээрги-Чаяакчы Бодунуң дүжүлгезин дээрлерде тургузуп алган, Ооң чагыргазы бүгү чүүлдү башкарып турар.

²⁰ Дээрги-Чаяакчының төлээлери – Ооң сөзүн сагып, айтыышкынын тооп дыңнаар күш-шыдалдыг дайынчылар, Ону алгап-йөрээңер!

²¹ Дээрги-Чаяакчының шупту аг-шерии – Ооң күзел-соруун күүседип турар чалчалар, Ону алгап-йөрээңер!

²² Дээрги-Чаяакчының хамык чаяалгазы Аңаа чагырткан бүгү черлерге Ону алгап-йөрээңер! Сеткилим Дээрги-Чаяакчыны алгап-йөрээзин!