Ырлар 100 - Ыдыктыг Библия

Давидтии. Мизмор-ыр.

¹ Энерел биле чөптүг шииткелди ырлаар мен, Дээрги-Чаяакчы, Сеңээ ырлап бээр мен.

² Кем-буруу чок орукту бодап чор мен: аңаа кажан чеде бээр мен? Оран-савамда бодумну арыг чүректиг алдынып чор мен.

³ Кандыг-даа дүржок чорукту мен көрүп турумда кылырын чөпшээревес мен, кемниг херектерни көөр хөңнүм чок – олар меңээ чыпшынмас.

⁴ Улуургак чүректи бодумдан ырадыр мен, кара сагыш ишти-хөңнүмге турбас.

⁵ Өске кижини бүдүү нүгүлдээр хейни узуткап каар мен; турамык көрүштүг, улуургак кижиден хөңнүм калыр.

⁶ Карактарым чер-делегейде бүзүрелдиг улусче көрүнген – олар мээң чанымга олурар эргелиг; кем-буруу чок орук-биле бар чыдар кижи меңээ бараан болур.

⁷ Мээң оран-савамга кара сагыштыг кижи чурттап шыдавас, мээң мурнумга мегечи кижи артып каап шыдавас.

⁸ Эртенниң-не чуртумнуң буруулуг улузун узуткап эгелээр мен – Дээрги-Чаяакчының хоорайында шупту бузут үүлгедикчилерин дазылындан тура тыртып, узуткаар мен.