Ырлар 10 - Ыдыктыг Библия

Хөгжүм башкарыкчызынга. Давидтии.

¹ Дээрги-Чаяакчыдан хоргадалды алыр мен. Силер меңээ: «Куш ышкаш, даглардыва ужувут» – деп чоондуңар?

² Көрүңер даан: бузуттуглар чазын хере тыртып алган, согуннарын кирижепкен – мөзүзү эки улусче караңгыда адар деп турлар.

³ Ниитилелдиң үндезиннерин үреп каапканда, чөптүг-шынныг кижи чүнү кылып шыдаарыл?

⁴ А Дээрги-Чаяакчы Бодунуң ыдыктыг өргээзинде, Ооң дүжүлгези – дээрлерде; Ооң карактары хайгаарап көрүп турар, Ооң көрүжү кижи төрелгетенни шенеп турар.

⁵ Дээрги-Чаяакчы буянныг-даа, бузуттуг-даа кижини шенээр, күчүлелге ынак кижини көөр хөңнү чок.

⁶ Ол оттуг көстерни, хып турар күгүрнү оларже чаъс дег чагдырар, өрттендир чиир изиг хат – оларның ижер дашказы болур.

⁷ Дээрги-Чаяакчы – чөптүг-шынныг, Ол улустуң шынныг херектеринге ынак, мөзүзү эки улусче чүүлдүгзүнүп көөр.