Ырлар 1 - Ыдыктыг Библия

¹ Бузуттугларның сүмезин дыңнавайн чоруур, бачыттыгларның үлегерин эдербес, кочуургактар аразынче кирбес кижи амыр-чыргалдыг!

² Ындыг кижи Дээрги-Чаяакчының хоойлузун дүн-хүн дивейн бодап, аңаа хандыкшып, таалал алыр.

³ Ындыг кижи суг эриинге олурткан, чимизи үезинде быжар, бүрүлери катпас ыяш ышкаш болур; чүнү-даа кылганда, чедиишкинни чедип алыр.

⁴ Бузуттуг улус көңгүс ындыг эвес – хатка ширбиткен бок сиген дег.

⁵ Бузуттуглар шииттирип тура, актыг үнмес, бачыттыглар чөптүг-шынныг улус аразынга турар чер тыппас.

⁶ Дээрги-Чаяакчы чөптүг-шынныг улустуң оруун билир, а бузуттуг улустуң оруун узуткаар болгай.