Соломоннуң өндүр бедик ырызы 8 - Ыдыктыг Библия

Ынакшыл өлүм ышкаш күштүг

¹ Авамны ээп өскен акым бооруң кай! Сени даштыгаа уткуп ап, улуска бактатпайн, ошкап каар ийик мен.

² Төрээн иемниң бажыңынга сени эккээримге, мени өөредип каар ийик сен. Амданы чаагай арагам база гранат чимизим чулуун ижиртир ийик мен.

³ Солагай холуңну сыртанып алдым, оң холуң-биле мени куспактап чыдыр сен.

⁴ Иерусалим кыстары, даңгыраглап көрүңер: одунгалак ынакшылды доюлдуруп, оттурбаңар!

Кыстың эш-өөрү

⁵ Эргим эжинге чөленип алгаш, ээн кургаг ховудан үнүп кел чыдар кыс кымыл? Яблок ыяжының адаанга сени оттурдум – аваң сени аңаа божаан, төрээн иең сени аңаа божуп-төрээн.

Кыс

⁶ Мени чүрээңге таңмалаштыр базып ап көр, салааңга база таңмалыг билзек дег суп ал. Ынакшыл өлүм ышкаш күштүг, хүннээшкин алдыы оран ышкаш каржы-дошкун; ынакшылдың оду өрттендир чиир – Дээрги-Чаяакчының чалбыыжы ол-дур;

⁷ үерлээн суглар ынакшылды өжүрүп шыдавас, хемнер-даа ону хөме албас. Бодунуң бүгү-ле байлаа-биле ынакшылды садып алыксаан кижиге бак көрүүшкүн-биле харыылаар.

Кыстың акылары

⁸ Эмиг-төжү ам-даа борбайбаан бичии кыс дуңмалыг бис. Улус ону кудалап кээрге, дуңмавысты канчаптар бис?

⁹ Бир эвес ол хана турган болза, мөңгүн суургалардан аңаа бедидир тудуп бээр ийик бис; бир эвес ол эжик турган болза, ону пөш ыяш-биле шып каар ийик бис.

Кыс

¹⁰ Мен – хана мен, эмиглерим – суургалар-ла. Эргимим менче көргеш, амыр-чыргалының үнер дөзүн көрүп кагды.

¹¹ Ваал-Гамонга Соломоннуң виноград шөлү турган, шөлүн ол ажаакчыларга бүзүреп дааскан: оон дүжүт алган кижи бүрүзү муң мөңгүн чоосту аңаа төлээр турган.

¹² А мээң виноград шөлүм бодумда бо-дур: муң мөңгүннү сен ап ал, Соломон, а бо ийи чүс чоосту – ооң дүжүдүн кадарган улуска берейн.

Эр

¹³ Сесерликтерде олурар кыс! Эш-өөрүң сээң үнүңнү дыңнаалап тур: меңээ база үнүңнү дыңнадып көр!

Кыс

¹⁴ Эргим эжим, дүрген келем! Чаагай чыттыг дагларда деге азы аныяк хүлбүс ышкаш бооп көрем!