Соломоннуң өндүр бедик ырызы 7 - Ыдыктыг Библия

¹ Эглип келем, Суламита, сени топтап көрүп аалы, эглип келем. Суламитаже, Маханаим самынче дег, чүү дээш топтап көөр силер?

Эр

² Ноян кызы, сандалиялыг буттарың кайгамчык-ла чараш-тыр! Эңмектелген дөңмектериң шевер кижи чонуп кылган каасталга дег.

³ Сээң хиниң – борбак хува: амданы чаагай арагазы төнмес болзун; сээң иштиң – лилиялар хаажылаан кызыл-тастың оваазы дег;

⁴ Ийи эмииң – ийи элик, чээренниң ийистери дег;

⁵ сээң мойнуң – чаан сөөгүнден чазаан суурга, карактарың – Эсевонда Бат-раббим хаалгазының чанында хөлдер, сээң думчууң – Дамаскыже көрүндүр турар Ливан сын дег;

⁶ сээң бажың – Кармил даг дег, бажың дүгү – чидиг хүрең торгу ышкаш – хаанның чүрээ туттуруп алган.

⁷ Ынак сарыым, тааланчыг кыс, кайгамчык-ла чараш-тыр сен, магаданчыың аажок-тур!

⁸ Сээң сының пальма ышкаш, эмиглериң ында үнген салбактар дег.

⁹ Бодалымда ол пальмаже үне берип, финик чимис салбактарын суйбаксаар мен. Сээң эмииң – виноград салбаа дег, сээң тыныжың – яблоксуг.

¹⁰ Сээң аксың – амданы чаагай арага дег. Ол арага эргим эжимче агып бар чыдар, удааннарның эриннеринче аяар агар.

Кыс

¹¹ Мен – эргимимнии мен, эжим меңээ хандыкшаан.

¹² Чоруулу че, эргим эжим, шөлдердиве үне берээл, хна үнүш аразынга хонуп аалы;

¹³ Эртен эрте чимистиг шөлдерже үне бергеш, көрүп көрээл: ында сыптар ногаарара берген-дир бе, чечек бажы чазылган бе, гранат ыяжы чечектелип турар-дыр бе? Орта сеңээ ынакшылым хайырлаар мен.

¹⁴ Мандрагорлар чаагай чыдын айдызап тур, эжиивис чанында хөй-ле чаагай чимистер бар: чаазын-даа, эргизин-даа сеңээ эккеп чыып бердим, эргим эжим.