Соломоннуң өндүр бедик ырызы 6 - Ыдыктыг Библия

Кайгамчык чараш душтук кыс

¹ Херээженнерниң эң-не чаражы кыс, эргим эжиң кайнаар барды, кайы угже чорувутту? Кады дилеп көрээлем че!

Кыс

² Эргим эжим сесерлиинче, чаагай чыттыг үнүштер тараан черже чоруй барган, ол аңаа кодан малын кадарар, лилияларны бодунга чыып аар.

³ Мен – эргимимнии мен, а эргимим – мээңии, лилиялар аразынга ол кодан малын кадарар.

Эр

⁴ Амыраам, Тирца ышкаш чараш-тыр сен, Иерусалим дег күзенчиг сен, тугун көдүрген аг-шериг дег түрлүг сен!

⁵ Мени девидедипкен карактарың чайладып көр. Бажың дүгү – Галаад даглардан халчып баткан кодан өшкү-ле.

⁶ Сээң диштериң – чугган соонда чанып бар чыдар хойлар-ла: кайызы-даа ийистеп алган, аразында чааскаан чорууру чок.

⁷ Баш шывар пөзүң адаанда чаактарың – гранат чимизиниң ийи чартыы-ла!

⁸ Хаан алдан кадынныг, сезен кул-кадайлыг, сан-түң чок кыстарлыг.

⁹ А мээң эжим – тергиин дээн чарашпай, көге-бугам – дың чаңгыс сен: төрээн иеңниң чаңгыс уруу, аваңның ынак кызы сен. Өөрү кыстар сени көргеш, аажок-ла алдаржыткан; хаанның кадыннары биле кул-кадайлары сени көргеш, амыр-чыргалдыг деп мактаан:

¹⁰ «Хаяалаштыр чырып үнүп кел чыдар, ай ышкаш каас-чараш, хүн ышкаш аяс чырык, тугун көдүрген аг-шериг ышкаш түрлүг – кымыл ол?»

Кыс

¹¹ Хем кыдыында ногаан шыкты көөр дээш, виноград сывы частып келгенин, гранат ыяжы чечектели бергенин көөр дээш, тооруктуг сесерликче дүжүп келдим.

¹² Бодум безин билбейн бардым – сеткилим мени ноян-биле кады чуузага олуртуп кагды.