Соломоннуң өндүр бедик ырызы 4 - Ыдыктыг Библия

Эргим кыстың чараш-каазы

¹ Кайгамчык-ла чараш-тыр сен, амыраам, кайгамчык-ла чараш-тыр сен. Баш шывар пөзүң адаанда карактарың көге-бугалар-ла, бажың дүгү – Галаад дагларындан халчып баткан кодан өшкү-ле.

² Сээң диштериң – чугган соонда чанып бар чыдар кыргып каапкан хойлар-ла: кайызы-даа ийистеп алган, аразында чааскаан чорууру чок.

³ Эриннериң кызыл торгу кожаа ышкаш, чугаа-сөзүң ээлдек-хоюг; баш шывар пөзүң адаанда чаактарың – гранат чимизиниң ийи чартыы-ла.

⁴ Сээң мойнуң Давидтиң бедидир туткан суургазы-ла, муң-муң дозуг-камгалалды ында аскан – олар шупту дайынчылар чепсектери.

⁵ Ийи эмииң – ийи элик дег, лилиялар аразында оъттап чоруур чээрен аңның ийистери дег.

⁶ Эртенги хүн сырыннаваанда, хөлегелер көжүп чылбаанда, мирралыг дагже, ладанныг тейже үне бергеш, аңаа турайн!

⁷ Амыраам, бүгү бодуң кайгамчык-ла чараш-тыр сен, четпес чүве сенде чок-тур.

Ынакшылдың сесерлии Эр

⁸ Ливандан чедип келем, душтуум, Ливандан чедип келем! Амана дагның бажындан, Сенир биле Эрмоннуң баштарындан дүжүп келем! Арзылаңнар чыдынындан, ирбиштиг даглардан дүжүп келем!

⁹ Чүгле чаңгыс-ла көрүжүң-биле, мойнуңда каасталгаңда чаңгыс-ла илчирбежигеш-биле чүрээмни сен доңнап алдың, душтуум дуңмай!

¹⁰ Ынакшылың тааланчыын, душтуум дуңмай, арагадан канчап-даа бол дээре-дир. Чагдынар үзүң чыды бүгү-ле чаагай чыттан эки-дир.

¹¹ Эриннериң – амданныг ары чигири, аксыңда – ары чигири биле сүт, хевиңниң чыды Ливанның эзиминиң чаагай чыды-ла.

¹² Душтуум дуңмай – хааглыг сесерлик сен, хааглыг сесерлик, дуглаглыг суг бажы сен!

¹³ Сээң сесерлииңде эң эки үнүш: гранат чимистери база хна биле нард үнүштер үнген.

¹⁴ Нард биле шафран, чигир кулузуну биле корица, ладанның шупту хевирлери, мирра биле алоэ, бүгү-ле эң чаагай чыттыг үнүштер-дир.

¹⁵ Сесерликте суг бажы сен, агым суглар сен, кудук сен, Ливандан агып баткан суглар сен.

Кыс

¹⁶ Соңгу чүктүң хады, оттуп кел, мурнуу чүктүң хады, ужугуп кел! Хат, мээң сесерлиимче хады-ла – чаагай чыды тарай берзин. Эргим эжим бодунуң сесерлиинче киргеш, эң эки чимизин чип алзын.