Саннар 6 - Ыдыктыг Библия

Назорейлер дугайында дүрүм-хоойлу

¹ Дээрги-Чаяакчы Моисейге мынча деп чугаалаан:

² «Израиль чонга мону дамчыдып чугаала. Бир эвес эр азы херээжен кижи назорей болурунуң онза даңгыраан берип, бодун Дээрги-Чаяакчыга бараалгадыр деп турар болза,

³ ол кижи арага болгаш өске-даа эзиртир суксун ижеринден ойталаар, виноградтан кылган ажыг хандыны азы кандыг-даа өске суксунну ишпес ужурлуг база чаа виноград каттарын-даа, кадырып каан үзүмнү-даа чивес ужурлуг.

⁴ Назорей бооп аңгыланган хуусаазының дургузунда ол кижи виноградтан кылган кандыг-даа аъш-чем чивес ужурлуг; виноград сөөкчүгештерин-даа, ооң картын-даа чивезин.

⁵ Назорей бооп даңгыраглаан хуусаазының дургузунда ол кижи бажының дүгүн шуут таарып, чүлүвес ужурлуг. Дээрги-Чаяакчыга бодун бараалгаткан хуусаазы эрткижеге чедир, ол кижи ыдыктыг бооп артар, бажының дүгүн узадыр өстүрер ужурлуг.

⁶ Дээрги-Чаяакчыга бодун бараалгаткан хуусаазының дургузунда ол кижи секче чоокшулавас ужурлуг.

⁷ Бодунуң ада-иези азы бодунуң акы-дуңмазы, азы угба-дуңмазы өлү бээрге безин, ол кижи оларже чоокшулавазын – арыг эвес апарбазын – Бурганга бараалгаттырганының демдээ ооң бажында көскү болгай.

⁸ Назорей бооп турары хуусааның дургузунда ол кижи Дээрги-Чаяакчының мурнунга ыдыктыг болур ужурлуг.

⁹ А назорейниң чанынга кандыг-бир кижи хенертен өлүп каарга, ооң назорей болганын демдеглеп турар бажы* бужартай берген дижик. Ол назорей кижи ооң соонда чеди хүн эрткенде – бодун арыглаар ужурлуу хүнде – бажының дүгүн дөңгүрертир чүлүп алзын.

¹⁰ Сески хүнде ол кижи ийи көге-буганы азы ийи көгээзинни Бурганның бараалгакчызынга, Ужуражылга майгынынче кирер черге эккээр ужурлуг.

¹¹ Бараалгакчы ол ийи куштуң бирээзин бачыт дээш өргүл кылдыр, а өскезин – бүрүн өрттедир өргүл кылдыр салгаш, өлүг кижиниң чанынга тургаш, арыг эвес апарган назорейни арыглап, ооң бажын ол-ла хүн ыдыктап кагзын.

¹² Демги кижи бодун Дээрги-Чаяакчыга бараалгадып, назорей болган хуусаазын катап эгелеп алгаш, кем-буруу дээш өргүл кылдыр бир харлыг эр хураганны эккеп салыр ужурлуг; а биеэги хуусаа хилис барган, чүге дээрге ооң баштай назорей бооп аңгыланганы бужар апарган-дыр.

¹³ Назорей бооп турар хуусаазы төне берген назорей кижи дугайында дүрүм бо-дур. Ол кижини Ужуражылга майгынынче кирер черге эккээрге,

¹⁴ Дээрги-Чаяакчыга дараазында өргүлдерни: четпес-дудуу эвес бир харлыг эр хураганны бүрүн өрттедир өргүл кылдыр, четпес-дудуу эвес бир харлыг кыс хураганны бачыт дээш өргүл кылдыр, четпес-дудуу эвес бир кошкарны эп-найырал өргүлү кылдыр эккеп салыр ужурлуг.

¹⁵ Бир аргаан хааржак ишти – кызыл-тас далганындан ажыткы-биле хөөтпейн быжырган, олива үзү холаан хлебтерни база олива үзү-биле кырын чаап каан чуга хаарган далганнарны эккеп салзын. Ол бүгү өргүлдер-биле кады далган-тараа база арага өргүлдерин салзын.

¹⁶ Бурганның бараалгакчызы ол бүгүнү Дээрги-Чаяакчының мурнунга эккелгеш, назорейниң бачыт дээш өргүлүн база бүрүн өрттедир өргүлүн салзын.

¹⁷ Бараалгакчы оон эп-найырал өргүлүнүң кошкарын бир аргаан хааржак ишти далганнар база хлебтер-биле кады Дээрги-Чаяакчыга өргүл кылдыр салзын. Оон далган-тараа өргүлүн болгаш арага өргүлүн база салзын.

¹⁸ Назорей кижи майгынче кирер черге ол назорей дээрзин демдеглеп турган бажын дөңгүрертир чүлүп алзын база бажының дүгүн ап алгаш, эп-найырал өргүлүнүң адаанда отче каапсын.

¹⁹ Бараалгакчы дүлүп каан кошкар өштүн база аргаан хааржактан бир хлебти, бир чуга хаарган далганны ап алгаш, бажын дөңгүрертир чүлүдүп алган назорейге тутсуп берзин.

²⁰ Оон бараалгакчы ол бүгүнү Дээрги-Чаяакчыга онза өргүлдер кылдыр бараалгатсын. Шак ол ыдыктыг өргүлдер Дээрги-Чаяакчыга өргүп салган төш болгаш дөңмек-биле кады бараалгакчыга хамааржыр. Ооң соонда назорей кижи арага ижип болур.

²¹ Назорей болурунуң даңгыраан берген кижи дугайында дүрүм ол-дур. Ооң назорей болганы дээш Дээрги-Чаяакчыга салыр ужурлуг өргүлү ол-дур. Оон аңгыда ол кижи бодунуң шаа-биле өске өргүлдерни база салып болур. Ол кижи назорей болурунуң дугайында дүрүм ёзугаар канчаар даңгыраглааныл, ынчаар күүседир ужурлуг».

Бараалгакчыларның чонну алгап-йөрээгени

²² Дээрги-Чаяакчы Моисейге мынча деп чугаалаан:

²³ «Ааронга болгаш ооң оолдарынга мону дамчыдып чугаала. Олар израиль чонну йөрээп тура, мынча дизин:

²⁴ „Дээрги-Чаяакчы сеңээ ачы-буян хайырлап, сени кадагалазын!

²⁵ Дээрги-Чаяакчы Бодунуң чырыткылыг арны-биле сени херелдендир чырытсын, сенче ээ көрүнзүн!

²⁶ Дээрги-Чаяакчы көрүжүн сенче ээлдирзин, чаагай чорукту сеңээ хайырлазын!“

²⁷ Аарон болгаш ооң оолдары Мээң адым-биле израильчилерни йөрээзин, Мен ынчан оларга ачы-буяным хайырлаар мен».