Саннар 5 - Ыдыктыг Библия

Арыг эвес улус дугайында дүрүм-хоойлу

¹ Дээрги-Чаяакчы Моисейге мынча деп чугаалаан:

² «Кеш аарыглыг, мага-бодундан чүве сыстып турар база өлген кижиге деггеш, арыг эвес апарган улустуң шуптузун турлагдан шөлүптерин израиль чонга дужаа.

³ Эр-даа, херээжен-даа улус болза, турлагдан шөлүптүңер – Мээң чон аразында чурттап турарым турлагны олар бужартатпазын».

⁴ Израиль чон ынчалдыр кылып, шак ындыг улусту турлагдан шөлүпкен; израильчилер Дээрги-Чаяакчы Моисейге канчаар дужааганыл, ынчаар күүсеткен.

Кем-буруу дээш төлевир

⁵ Дээрги-Чаяакчы Моисейге мынча деп чугаалаан:

⁶ «Израиль чонга мону чугаала. Бир эр азы херээжен кижи өске кижиге удур кандыг-бир бачыт үүлгеткени-биле Дээрги-Чаяакчыга удур кемниг херек кылыр болза, ол дээш буруулуг-дур.

⁷ Ынчангаш ол эр азы херээжен кижи үүлгеткен бачыдын миннип чугаалазын, чедирген когаралы дээш төлевирниң бүрүн өртээнге ол эт-хөреңгиниң өртээниң бештиң бирин немээш, когараан кижиге төлезин.

⁸ Когараан кижи боду өлүп калган, а ооң чоок төрелдери турбаан дижик. Чедирген когарал дээш төлевирни алыр кижи чок болза, ол Дээрги-Чаяакчыга хамааржыр – ынчангаш бараалгакчының буруулуг кижини арыглап турары кем-буруу дээш өргүүр кошкарга немей ол төлевир бараалгакчыныы болзун.

⁹ Израиль чоннуң бараалгакчыга эккеп турар ыдыктыг онза өргүлдери шуптузу база бараалгакчыга хамааржыр.

¹⁰ Кандыг-даа кижиниң ыдыктыг өргүлү бараалгакчыга хамааржыр; кандыг-даа кижиниң бараалгакчыга эккеп берип турар чүвези аңаа хамааржыр».

Хүннээшкин дугайында дүрүм-хоойлу

¹¹ Дээрги-Чаяакчы Моисейге мынча деп чугаалаан:

¹² «Израиль чонга мону дыңнадып чугаала. Кандыг-бир эр кижиге кадайы өскерлип, ашаанга шынчы эвес апарган дижик.

¹³ Өске эр кижи ол кадай-биле хойгашкаш, үре төгерге, ол чорук херээженниң ашаанга билдинмейн барып, демги херээжен чажыды-биле бужар болу бээрге, аңаа херечи болур кижи турбаан, херээженниң мегези туттурбаан дижик.

¹⁴ Ашаа хүннээчел сагышка алзып, бодунуң арыг эвес кадайын хүнней берген азы арыг эвес апарбаан-даа кадайын хей черге хүнней берген дижик.

¹⁵ Ашаа ынчан кадайын Бурганның бараалгакчызынга эккелгеш, ол дээш өргүл кылдыр бир эфа иштиниң оннуң бир кезээ арбай далганын салзын, ынчалза-даа далганче олива үзү кутпазын база ладан салбазын, чүге дээрге ол далган-тараа – хүннээшкин өргүлү-дүр, кем-буруу дугайында сагындырап турар сактыышкын өргүлү-дүр.

¹⁶ А бараалгакчы ол херээженни Дээрги-Чаяакчының мурнунче чоокшулады берзин.

¹⁷ Оон дой савага ыдыктыг суг куткаш, Ужуражылга майгынының иштинде черден довурактан ап алгаш, ол сугже урупсун.

¹⁸ Бараалгакчы демги херээженни Дээрги-Чаяакчының мурнунга тургускаш, ооң бажының дүгүн часкаш, сактыышкын өргүлүн ооң холунга тутсуп берзин – ол дээрге хүннээшкин өргүлү-дүр, а бараалгакчының холунга херээжен кижиже каргыш халдадыр ажыг суг турар.

¹⁹ Ооң соонда бараалгакчы демги херээженниң аксы-сөзүн алыр дээш: „Сээң-биле кым-даа хойгашпаан болза, сен арыг хевээр артып, ашааңга өскерилбээн болзуңза, каргыш халдадыр бо ажыг суг сеңээ хора чедирбес.

²⁰ А бир эвес ашааңга өскерлип, бужар апарган болзуңза, ашааңдан өске эр кижи-биле хойгажыпкан болзуңза...“ – дээр.

²¹ Бараалгакчы оон ол херээженге каргыш салып, мынча деп чугаалаар: „Дээрги-Чаяакчы сени бодунуң чонунга каргаттырып, бак сөглеттирген кижи кылып кагзын – сээң урууң савазы кургап, хырның сиңе берзин.

²² Каргыш халдадыр бо суг ишти-хырныңче киир аксын – сээң урууң савазы кургап, хырның сиңе берзин“. А херээжен кижи: „Аминь, ындыг-ла болзун“ – деп даңгыраглазын.

²³ Бараалгакчы ол каргыш сөстерин дүрүг-номга бижээш, ажыг сугже балалдыр чуп каапсын,

²⁴ оон каргыш халдадыр ажыг сугну демги херээженге ижиртир ужурлуг – аңаа ажыг-човалаң көргүзер ол суг ооң иштинче кире берзин.

²⁵ Бараалгакчы ол херээженниң холундан хүннээшкин өргүлүнүң далган-тараазын ап алгаш, ону онза өргүл кылдыр Дээрги-Чаяакчының өргүл бедигээжинче салып кагзын.

²⁶ Бараалгакчы далган-тараа өргүлүнден бир адыш ишти – сагындырыг болур кезээн ап алгаш, ону өргүл бедигээжинге өрттедипсин, а ооң соонда демги херээженге сугну ижиртсин.

²⁷ Сугну херээженге ижирткен соонда, ол бужар бооп, ашаанга өскерилген болза, каргыш халдадыр суг ооң иштинче киргеш, ажыг-човалаң көргүзер – ооң уруг савазы кургап, хырны сиңе бээр, ол херээжен чонунуң аразынга каргаттырар.

²⁸ А бир эвес ол херээжен бужар чүве кылбаан, арыг хевээр болза, аңаа хора халдавас, харын ажы-төл божуп шыдаар аргалыг болур.

²⁹ Хүннээшкин дугайында дүрүм-хоойлу бо-дур: кадайы ашаанга өскерилгеш, арыг эвес болу бергенде

³⁰ азы ашаа кижи хүннээчел сагышка алыскаш, кадайын хүнней бергенде, ону ажыглаар. Ашаа ол таварылгада кадайын Дээрги-Чаяакчының мурнунга эккеп тургузуптарга, бараалгакчы ол бүгүнү бо дүрүм-хоойлу ёзугаар кадайынга хамаарыштыр күүседир.

³¹ Ашаа кижи буруудан арыг болур, а кадайы буруузун боду чүктээр».