Саннар 36 - Ыдыктыг Библия

Салпаадтың кыстарының хувааглыг чери

¹ Галаадтың төрел бөлүүнүң баштыңчылары (Галаад – Махирниң оглу, Махир – Манассияның оглу, а Манассия – Иосифтиң оглу) Моисейге база израиль чоннуң аймактарының баштыңнарынга чедип келгеш,

² мынча дээннер: «Дээрги-Чаяакчы бистиң дээргивиске черни израиль чонга төлге даштары октааш, үлеп-хуваарын дужааган болгай. Дээрги-Чаяакчы бистиң акывыс Салпаадтың хувааглыг черин ооң кыстарынга дамчыдып бээрин база дужааган болгай.

³ А ол кыстар израиль чоннуң өске-бир аймаандан үнген эрлер-биле өгленчип алган дижик. Ынчан ол кыстарның хувааглыг чери ада-өгбевистен биске дамчып келген черден казыттынып, өске аймактың черинге каттыжа бээр-дир, биске айтып берген хувааглыг чер кызырлыр-дыр.

⁴ Кажан израиль чонга Хосталга чылы кээрге, Салпаадтың кыстарының хувааглыг черин оларның ашакка барганы аймак шуут-ла ээлеп аар-дыр, ада-өгбевистен биске дамчып келген черден оларның чери казыттына бээр-дир».

⁵ Моисей израиль чонга Дээрги-Чаяакчының берген айтыышкынын дамчыдып чугаалаан: «Иосифтиң үре-салгалының аймаа шынын чугаалап тур.

⁶ Салпаадтың кыстарынга хамаарыштыр Дээрги-Чаяакчының айтыышкыны бо-дур. Олар боттарының эки деп көрген кижизи-биле өгленчип ап болур, ынчалза-даа чүгле ада-өгбезиниң аймаанга хамааржыр төрел бөлүктүң эр улузу-биле өгленчип алзыннар.

⁷ Израиль чонга хамааржыр хувааглыг чер бир аймактан өске аймакче шилчивезин, израиль кижи бүрүзү бодунуң ада-өгбезиниң аймаанга хамааржыр черни кадагалап арттырар ужурлуг.

⁸ Израиль аймактарда бодунуң ачазының хувааглыг черин салгап алган кыс кижи бүрүзү ачазының аймаанда төрел бөлүкке хамааржыр эр кижи-биле өгленчип алыр ужурлуг, ынчан израиль кижи бүрүзү бодунуң ада-өгбезиниң хувааглыг черин салгап алыр

⁹ база хувааглыг чер бир аймактан өске аймакче шилчивес. Израиль чоннуң аймак бүрүзү бодунуң хувааглыг черин кадагалап арттырар ужурлуг».

¹⁰ Салпаадтың кыстары Дээрги-Чаяакчы Моисейге канчаар дужааганыл, ынчаар күүсеткен.

¹¹ Салпаадтың кыстары: Махла, Тирца, Хогла, Милка болгаш Ноа олар ачазының ха-дуңмазының оолдары-биле өгленчип алган.

¹² Олар Иосифтиң оглу Манассияның аймаанда бир төрел бөлүктүң эр улузунга барып алган болгаш, оларның хувааглыг чери ачазының аймаанга хамааржып артып калган.

¹³ Дээрги-Чаяакчының израиль чонга Моисейни дамчыштыр Моавтың ховуларынга, Иордан хемниң кыдыынга, Иерихон хоорайның дужунга берген айтыышкыннары болгаш дүрүмнери ол-дур.