Саннар 35 - Ыдыктыг Библия

Левиттерниң хоорайлары

¹ Дээрги-Чаяакчы Моисейге Моавтың ховуларынга, Иордан хемниң кыдыынга, Иерихоннуң дужунга мынча деп чугаалаан:

² «Израиль чонга мону дужаап чугаала. Олар боттарының ээлеп турар хувааглыг черлеринден левиттерге чурттаар хоорайлардан аңгылап берзин база хоорайларны долгандыр турар шөлдерни оларга үзүп берзин.

³ Левиттер ол хоорайларга чурттазын, а шөлдер оларның шупту мал-маганынга, кодан сүрүглеринге одар-белчиир болзун.

⁴ Оларга бээр хоорайларыңарны долгандыр турар шөлдер хоорай ханаларындан бүгү талаларже 1000 кыры дурту шөйлүр ужурлуг.

⁵ Ортузунда турар хоорайның даштынга чөөн талаже углай 2000 кыры дуртун, мурнуу талаже – 2000 кыры дуртун, барыын талаже – 2000 кыры дуртун, соңгу талаже – 2000 кыры дуртун хемчээп алыңар. Левиттерниң хоорайлар чоогунга алыр шөлдериниң хемчээли ол-дур.

⁶ Левиттерге берип турарыңар хоорайларның алдызы хоргадал-хоорайлар болзун – өлүрүкчү кижиниң дезе бээр чери кылдыр оларны тускайлап каар силер. Оларга немей левиттерге дөртен ийи хоорайдан аңгылап бээр силер.

⁷ Левиттерге бээр ужурлуг хоорайларыңарның ниити саны – дөртен сес, оларны долгандыр турар шөлдерни база левиттерге бээр силер.

⁸ Израиль чоннуң ээлел черинден хоорайлар аңгылап берип турда, хөй санныг аймак – хөй хоорайларны, эвээш санныг аймак – эвээш хоорайларны, бодунуң алыр хувааглыг черинге дүүштүр, левиттерге аңгылап бээр ужурлуг».

Хоргадал-хоорайлар

⁹ Дээрги-Чаяакчы Моисейге мынча деп чугаалаан:

¹⁰ «Израиль чонга мону дамчыдып чугаала. Иорданны кежип, ханаан черже кире бергеш,

¹¹ бодуңарга хоргадал-хоорайлардан тодарадып алыңар. Бир кижини эндеп каан кижи ол хоорайларже дезе берип шыдаар болзун.

¹² Өлүрүкчү кижиге ол хоорайлар өлүрткен кижиниң өжээнин негээн төрелинден хоргадаар чер болур; өлүрүкчү кижи ниитилел мурнунга шииттирбээн шаанда, өлбес ужурлуг.

¹³ Силерниң аңгылап берип турарыңар хоргадал-хоорайларның саны алды болур ужурлуг.

¹⁴ Иорданның чөөн талазынга үш хоорайдан, ханаан черге база үш хоорайдан аңгылап калыңар – хоргадал-хоорайларыңар ол болзун.

¹⁵ Шак ол алды хоорай израильчилерге-даа, силерниң араңарда доктаамал азы түр када чурттап турар даштыкы кижиге-даа хоргадал-хоорайлар болзун, бир-ле кижини эндеп каан кижи ынаар дезе берзин.

¹⁶ Бир эвес кандыг-бир кижи өске-бир кижини демир эт-херексел-биле согарга, демгизи өлүп калган болза, сопкан кижи – өлүрүкчү-дүр, ону өлүрүп каар ужурлуг.

¹⁷ Кижини өлүр соп каап болур дашты кандыг-бир кижи холунга туткаш, өске-бир кижини согарга, демгизи өлүп калган болза, сопкан кижи – өлүрүкчү-дүр, ону өлүрүп каар ужурлуг.

¹⁸ Кижини өлүр соп каап болур ыяш эт-херекселди кандыг-бир кижи холунга туткаш, өске-бир кижини согарга, демгизи өлүп калган болза, сопкан кижи – өлүрүкчү-дүр, ону өлүрүп каар ужурлуг.

¹⁹ Өлүрткен кижи дээш өжээн негекчизи өлүрүкчүге таваржы бергеш, ону өлүрүп каап болур.

²⁰ Бир эвес кандыг-бир кижи өске-бир кижини көөр хөңнү чогундан идиптерге азы олче сагыштыы-биле бир чүве октаптарга, демгизи өлүп калган болза,

²¹ азы өжээргээш, өске-бир кижини холу-биле шанчыптарга, демгизи өлүп калган болза, халдаашкын кылган кижи – өлүрүкчү-дүр, ону өлүрүп каар ужурлуг. Өлүрткен кижи дээш өжээн негекчизи өлүрүкчүге таваржы бергеш, ону өлүрүп каап болур.

²² А бир эвес кандыг-бир кижи өске-бир кижини душ бооп, өжээннешпейн идиптерге, азы олче эндег болуп бир чүве октаптарга,

²³ азы эскербээни өске-бир кижиже кижини өлүр соп каап болур даш октаптарга, демгизи өлүп калган дижик. А ол кижи өлген кижиниң дайзыны турбаан база аңаа бак чүве күзевээн болза,

²⁴ ниитилел өлүрүкчү кижи биле өжээн негекчизиниң аразында херекти бо дүрүмнер ёзугаар үзе шиитпирлээр ужурлуг.

²⁵ Ниитилел душ бооп кижи өлүрген кижини өжээн негекчизиниң холундан камгалап, ооң мурнунда аңаа турганы хоргадал-хоорайже дедир чорудуптар ужурлуг. Ол кижи ыдыктыг олива үзү-биле шилип чагган дээди бараалгакчының өлүмүнге чедир ол хоорайга артып калзын.

²⁶ Бир эвес өлүрүкчү кижи бодунуң чурттап турары хоргадал-хоорайның кызыгаарындан ооң бетинде үне бээрге,

²⁷ өжээн негекчизи ол кижини хоргадал-хоорайның даштынга тудуп алгаш, өлүрүп каан болза, ону өлүрген дээш буруудавас.

²⁸ Чүге дээрге өлүрүкчү дээди бараалгакчының өлүмүнге чедир бодунуң хоргадал-хоорайынга артып каар ужурлуг турган; а дээди бараалгакчы өлген соонда, ол кижи бодунуң ээлел черинче ээп кээп болур.

²⁹ Ол бүгү силерге салгалдан салгал дамчып, чурттап турар шупту черлериңерге доктаадып каан дүрүм-хоойлу болзун.

³⁰ Кандыг-даа өлүрүкчү кижини элээн каш херечиниң сөзүн ёзугаар өлүрүп каар ужурлуг. А чүгле чаңгыс херечи бар болза, ол кижини өлүрүп шиидип болбас.

³¹ Кижи өлүрген дээш буруулуг кижиниң амы-тынының садыызы кылдыр төлевир албаңар, ол кижини өлүрүп каар ужурлуг.

³² Бир эвес хоргадал-хоорайже дезип чоруй барган кижи бодунуң черинче чаныксай бээр болза, дээди бараалгакчы өлбээнде, аңаа чөпшээрел бербеңер, ол дээш төлевир албаңар.

³³ Чурттап турар чериңерни ооң-биле бужартатпаңар; төгүлген хан черни бужартадып каар болгай, ол чер аңаа төгүлген хандан чүгле өлүрүкчү кижиниң ханы-биле арыглаттынар.

³⁴ Чурттап турарыңар, Мээң ында турарым черни арыг эвес кылбаңар: Мен – Дээрги-Чаяакчы, израиль чоннуң аразында чурттап турар мен!»