Саннар 34 - Ыдыктыг Библия

Ханаан черниң кызыгаарлары

¹ Дээрги-Чаяакчы Моисейге мынча деп чугаалаан:

² «Израиль чонга мону дужаап чугаала. Ханаан черже кире бээриңерге, силерге ээлээр кылдыр хувааттынган черниң кызыгаарлары бо-дур.

³ Ооң мурнуу талазы Цин ховузундан ыңай, Эдомнуң кызыгаарын дургаар шөйлүр, силерниң мурнуу кызыгаарыңар Дус далайның мурнуу кыдыындан эгелээш, барыын чүкче шөйлүр.

⁴ Ол кызыгаар мурнуу чүкке Акравим деп бедик черже шиглей шөйүлгеш, Цин ховузун таварып эрткеш, Кадес-Варниге чедер, оортан Гацар-Аддарга четкеш, Ацмонну таварып эртер.

⁵ Ацмондан ыңай кызыгаар Египет-биле кызыгаарда турар хемче шиглей шөйүлгеш, далайга чедер.

⁶ Барыын талакы кызыгаарыңар Улуг далай эрии болур.

⁷ Соңгу талакы кызыгаарыңарны Улуг далайдан Ор дагга чедир демдектеңер,

⁸ а Ор дагдан Лево-Хаматка чедир демдектеңер; кызыгаарның бурунгаар үне берген чери Цедадка чедер.

⁹ Оортан кызыгаар Цифронче шөйүлгеш, Гацар-Энанга чедер. Силерниң соңгу кызыгаарыңар ол-дур.

¹⁰ Чөөн кызыгаарыңарны Гацар-Энандан эгелеп алгаш, Шефамга чедир демдектеңер.

¹¹ Чөөн кызыгаар Шефамдан Ривлаже Аинниң чөөн талазындан шөйүлгеш, Киннерет хөлдүң чөөн талакы эриктеринге чедер.

¹² Ооң соонда Иордан хемниң кыдыын дургаар баткаш, Дус далайга чедер. Силерниң чериңерниң бүгү талалардан кызыгаарлары ол-дур».

¹³ Моисей израиль чонга: «Дээрги-Чаяакчының тос аймакка база Манассияның аймааның чартыынга бээр кылдыр дужаап каан чери бо-дур, силер ону төлге даштары октааш, үлежип аар силер.

¹⁴ Чүге дээрге Рувимниң болгаш Гадтың аймактары төрел бөлүктер аайы-биле база Манассияның аймааның өске чартыы хувааглыг черлерин ап алган-дыр.

¹⁵ Ол ийи аймак база Манассияның аймааның ол чартыы боттарының хувааглыг черлерин Иорданның чөөн талазынга, Иерихоннуң дужунга ап алган болгай» – деп айтып-чагаан.

Черни үлеп-хуваар улустуң аттары

¹⁶ Дээрги-Чаяакчы Моисейге мынча деп чугаалаан:

¹⁷ «Черни силерге үлеп-хуваар улус бо-дур: Элеазар бараалгакчы биле Нуннуң оглу Иисус.

¹⁸ Олар-биле кады черни хуваар кылдыр бир аймактан-на бир баштың кижиден ап алыңар.

¹⁹ Ол баштыңнарның аттары бо-дур: Иуданың аймаандан – Иефоннийниң оглу Халев;

²⁰ Симеоннуң аймаандан – Аммиудтуң оглу Самуил;

²¹ Вениаминниң аймаандан – Кислоннуң оглу Элидад;

²² Данның аймаандан – Иоглийниң оглу Буккий;

²³ Иосифтиң оглу Манассияның аймаандан – Эфодтуң оглу Ханниил;

²⁴ Иосифтиң оглу Эфремниң аймаандан – Шифтанның оглу Кемуил;

²⁵ Завулоннуң аймаандан – Фарнактың оглу Элицафан;

²⁶ Иссахарның аймаандан – Азанның оглу Фалтиил;

²⁷ Асирниң аймаандан – Шеломиниң оглу Ахиуд;

²⁸ Неффалимниң аймаандан – Аммиудтуң оглу Педаил».

²⁹ Ханаан черни израиль чонга үлеп-хуваар кылдыр Дээрги-Чаяакчының дужаал берген улузу ол-дур.