Саннар 33 - Ыдыктыг Библия

Израиль чоннуң Египеттен көжүп үнгенин катап бижээни

¹ Египет черден бодунуң чурум-чыскаалдыг бөлүктерин ёзугаар, Моисей биле Ааронга баштаткаш, үнүп келген израиль чоннуң көжүп эртип турган черлери бо-дур.

² Моисей Дээрги-Чаяакчының айтыышкынын ёзугаар көжүп чораан үезинде чоннуң доктаап турган турлагларын тодарадып бижип каан. Оларның көш үезинде доктаап турган турлаглары бо-дур.

³ Израиль чон бир айның он беште Раамсестен көжүп үнген; олар Хосталыышкын байырлалы демдеглээн хүннүң даартазында, бүгү египет чон көрүп турда, эрес-дидими-биле бар чытканнар.

⁴ А египетчилер ол үеде Дээрги-Чаяакчының чок кылып кааны дун оолдарын ажаап турган – оларның бурганнарын Дээрги-Чаяакчы шиидип каан болган.

⁵ Израиль чон Раамсестен көжүп үнгеш, Сокхотка турлагжып алган.

⁶ Олар Сокхоттан көжүп үнгеш, ээн кургаг ховунуң кыдыында турар Этамга турлагжып алганнар.

⁷ Этамдан көжүп үнгеш, Ваал-Цефоннуң дужунда Пи-Гахиротче дедир ээпкеш, Мигдолдуң мурнунга турлагжып алганнар.

⁸ Пи-Гахироттан көжүп үнгеш, далай ортузу-биле ээн кургаг ховуже эрте бергеш, Этам деп ээн кургаг ховуга үш хүн дургузунда чоруп-чоруп, Марага турлагжып алганнар.

⁹ Марадан көжүп үнгеш, Элимге чедип келгеннер. А Элимде он ийи суг бажы биле чеден пальма ыяш бар болган, олар аңаа турлагжып алганнар.

¹⁰ Израильчилер Элимден көжүп үнгеш, Кызыл далай чанынга турлагжып алганнар.

¹¹ Кызыл далайдан көжүп үнгеш, ээн кургаг Син ховузунга турлагжып алганнар.

¹² Син ховузундан көжүп үнгеш, Дофкага турлагжып алганнар.

¹³ Дофкадан көжүп үнгеш, Алушка турлагжып алганнар.

¹⁴ Алуштан көжүп үнгеш, Рефидимге турлагжып алганнар. Ол черде ижер суг чок болган.

¹⁵ Рефидимден көжүп үнгеш, Синай ховузунга турлагжып алганнар.

¹⁶ Синай ховузундан көжүп үнгеш, Киброт-Гаттаавага турлагжып алганнар.

¹⁷ Киброт-Гаттаавадан көжүп үнгеш, Асиротка турлагжып алганнар.

¹⁸ Асироттан көжүп үнгеш, Ритмага турлагжып алганнар.

¹⁹ Ритмадан көжүп үнгеш, Римнон-Фарецке турлагжып алганнар.

²⁰ Римнон-Фарецтен көжүп үнгеш, Ливнага турлагжып алганнар.

²¹ Ливнадан көжүп үнгеш, Риссага турлагжып алганнар.

²² Риссадан көжүп үнгеш, Кегелафага турлагжып алганнар.

²³ Кегелафадан көжүп үнгеш, Шафер даг чанынга турлагжып алганнар.

²⁴ Шафер дагдан көжүп үнгеш, Харадага турлагжып алганнар.

²⁵ Харададан көжүп үнгеш, Макелотка турлагжып алганнар.

²⁶ Макелоттан көжүп үнгеш, Тахатка турлагжып алганнар.

²⁷ Тахаттан көжүп үнгеш, Тарахка турлагжып алганнар.

²⁸ Тарахтан көжүп үнгеш, Мифкага турлагжып алганнар.

²⁹ Мифкадан көжүп үнгеш, Хашмонага турлагжып алганнар.

³⁰ Хашмонадан көжүп үнгеш, Мосеротка турлагжып алганнар.

³¹ Мосероттан көжүп үнгеш, Бене-Яаканга турлагжып алганнар.

³² Бене-Яакандан көжүп үнгеш, Хор-Агидгадка турлагжып алганнар.

³³ Хор-Агидгадтан көжүп үнгеш, Иотвафага турлагжып алганнар.

³⁴ Иотвафадан көжүп үнгеш, Авронага турлагжып алганнар.

³⁵ Авронадан көжүп үнгеш, Эцион-Гаверге турлагжып алганнар.

³⁶ Эцион-Гаверден көжүп үнгеш, Цин ховузунда Кадеске турлагжып алганнар.

³⁷ Кадестен көжүп үнгеш, Эдом чурттуң кызыгаарында Ор дагның чанынга турлагжып алганнар.

³⁸ Аарон бараалгакчы Дээрги-Чаяакчының дужаалын ёзугаар Ор дагже үне бергеш, израиль чоннуң египет черден үнүп чорутканының дөртенги чылында, беш айның бирээде ол дагга мөчээн.

³⁹ Ор дагга мөчүүрде, Аарон 123 харлыг турган.

⁴⁰ Ол үеде ханаан черниң Негевте турар Арад хоорайының хананей хааны израиль чоннуң кел чыдарын дыңнап каан чүве-дир.

⁴¹ Израильчилер Ор дагдан көжүп үнгеш, Салмонага турлагжып алганнар.

⁴² Салмонадан көжүп үнгеш, Пунонга турлагжып алганнар.

⁴³ Пунондан көжүп үнгеш, Овотка турлагжып алганнар.

⁴⁴ Овоттан көжүп үнгеш, Моавтың кызыгаарында чыдар Ийе-Аваримге турлагжып алганнар.

⁴⁵ Ол черден көжүп үнгеш, Дивон-Гадка турлагжып алганнар.

⁴⁶ Дивон-Гадтан көжүп үнгеш, Алмон-Дивлатаимге турлагжып алганнар.

⁴⁷ Алмон-Дивлатаимден көжүп үнгеш, Аварим дагларынга, Нево дагның баарынга турлагжып алганнар.

⁴⁸ Аварим дагларындан көжүп үнгеш, Моавтың ховуларынга, Иордан хемниң кыдыынга, Иерихоннуң дужунга турлагжып алганнар.

⁴⁹ Олар Иорданның чөөн талакы кыдыынга, Моавтың ховуларынга Бет-Иешимоттан Авел-Ситтимге чедир девискээрге турлагжып алганнар.

⁵⁰ Дээрги-Чаяакчы Моавтың ховуларынга, Иордан хемниң кыдыынга, Иерихоннуң дужунга Моисейге мынча деп чугаалаан:

⁵¹ «Израиль чонга мону дамчыдып чугаала. Иордан хемни кежип, ханаан черге чеде бергеш,

⁵² ол черниң бүгү чурттакчыларын мурнуңардан сывырып чорудуптуңар, оларның чонуп, шуткуп кылган хамык дүрзү-бурганнарын узуткап кааптыңар, мөгейиишкин кылыр бедик черлерин үрегдеп кааптыңар.

⁵³ Ол черни эжелеп алгаш, аңаа чурттай бериңер, чүге дээрге Мен ону ээлезин дээш силерге берип тур мен.

⁵⁴ Черни үлээрде, төлге даштары октааш, төрел бөлүк бүрүзүнге хувааглыг черден айтып бээр силер. Хөй санныг төрел бөлүк – улуг хувааглыг чер, а эвээш санныг төрел бөлүк – улуг эвес хувааглыг чер алзын; төлге даштары ол төрел бөлүкке кайнаар айтып дүжер-дир, төрел бөлүк хувааглыг черин аңаа алзын. Хувааглыг черлериңерни ада-өгбеңерден укталган аймактарыңар аайы-биле алыр силер.

⁵⁵ А бир эвес бо черниң чурттакчыларын мурнуңардан сывырып чорудуппас болзуңарза, оларның арткан улузу силерге карактарыңарже кадалган чартылар, быктыңарже кадалган теннер дег болу бээр база ээлеп чурттай бээр чериңерге силерни кызып-кыяр.

⁵⁶ Мен ынчан силерни, оларны канчаар аажылаар деп турганым дег, ынчаар аажылаар мен».