Саннар 3 - Ыдыктыг Библия

Левиттерниң чизе-бүрүткели болгаш албан-хүлээлгелери

¹ Аарон биле Моисейниң төрел бөлүүнден укталган улус бо-дур. Дээрги-Чаяакчы Моисей-биле Синай дагга чугаалажып турган үеде,

^2-3 Аарон дараазында оолдарлыг болган: дун оглу Надав, Авиуд, Элеазар болгаш Ифамар. Оларны Бурганга бараан боор кылдыр ыдыктап, шилип чаап каан турган.

⁴ Ынчалза-даа Надав биле Авиуд ийи Синай ховузунга Дээрги-Чаяакчының таарымчалыг деп көрбээни отту Аңаа эккеп салгаш, Ооң мурнунга өлүп калган, а оларның соон салгаар оолдары турбаан. Чүгле Элеазар биле Ифамар ачазы Аарон-биле кады Дээрги-Чаяакчының бараалгакчылары бооп арткан.

⁵ Дээрги-Чаяакчы Моисейге мынча деп чугаалаан:

⁶ «Левийниң аймаан, Бурганның бараалгакчызы Ааронга дузалаар кылдыр, ооң мурнунга эккеп каг.

⁷ Левиттер ыдыктыг черге кылыр ужурлуг ажылдар кылып, Аароннуң база шупту чоннуң өмүнээзинден Ужуражылга майгынының мурнунга албан-хүлээлгени күүсетсиннер.

⁸ Олар майгынның хамык эт-херекселдери дээш ээ-харыысалгалыг болуп, ыдыктыг черге ажылдар кылып, израильчилерниң албан-хүлээлгелерин күүсетсиннер.

⁹ Левиттерни Ааронга болгаш ооң оолдарынга хүлээдип бер – израиль чоннуң аразындан Ааронга хүлээдип бээр ужурлуг улус ол-дур.

¹⁰ А Ааронга болгаш ооң оолдарынга боттарының бараалгакчы хүлээлгезин күүседир даалгадан берип каг – өске-бир кижи ол бараан болуушкунга киржи бээр болза, ону өлүрүп каар ужурлуг».

¹¹ Оон Дээрги-Чаяакчы Моисейге мынча деп дужааган:

¹² «Мен левиттерни израиль чоннуң баштай төрүттүнген бүгү оолдарының орнунга ап алган мен, ынчангаш олар ам Меңээ хамааржыр.

¹³ Дун төл бүрүзү-ле Мээңии болгай; шупту египет дун төлдерни узуткап каан хүнүмде израиль чонда кижиниң-даа, мал-маганның-даа дун төлдерин Бодумга аңгылап, ыдыктап алган мен – олар ам Меңээ хамааржыр. Мен – Дээрги-Чаяакчы-дыр мен».

¹⁴ Дээрги-Чаяакчы Моисейге Синай ховузунга мынча деп чугаалаан:

¹⁵ «Левийниң үре-салгалын оларның төрел бөлүктерин, ада-өгбезин барымдаалап, чизелеп сана. Бир айдан өрү назылыг шупту эр улусту санап каг».

¹⁶ Моисей оларны Дээрги-Чаяакчының дужаал берген сөзүнүң аайы-биле санап каан.

¹⁷ Левийниң оолдарының аттары бо-дур: Гирсон, Кохат болгаш Мерари.

¹⁸ Гирсоннуң оолдарының аттары: Ливни биле Шимей, олардан төрел бөлүктер укталган.

¹⁹ Кохаттың оолдары Амрам, Ицгар, Хеврон болгаш Узиил олардан база төрел бөлүктер укталган.

²⁰ Мерариниң оолдары Махли биле Мушиден база төрел бөлүктер укталган. Левийден укталган, ада-өгбе барымдаалап адаан төрел бөлүктер ол-дур.

²¹ Гирсондан укталган төрел бөлүктер: ливни биле шимей; олар Гирсоннуң төрел бөлүктери-дир.

²² Оларны санаарга, бир айдан өрү назылыг эр улустуң ниити саны 7500 кижи болган.

²³ Гирсондан укталган төрел бөлүктер майгынның артынга, ооң барыын талазынга турлагжып аар турган.

²⁴ Гирсоннуң үре-салгалының баштыңы – Лаелдиң оглу Элиасаф.

²⁵ Ужуражылга майгынынга Гирсоннуң үре-салгалынга хайгаараар кылдыр дагзып турар чүүлдер бо-дур: майгынның боду, ооң шывыы, майгынче кирер черниң көжегези,

²⁶ майгынны болгаш өргүл салыр бедигээшти долгандыр турар херимниң шывыглары, херимче кирер черниң хаалга-шывыы база майгынның шупту ажылдарын кылырынга херек хендирлер.

²⁷ Кохаттан укталган төрел бөлүктер: амрам, ицгар, хеврон болгаш узиил; олар Кохаттың төрел бөлүктери-дир.

²⁸ Оларда бир айдан өрү назылыг эр улустуң ниити саны 8600 кижи болган. Олар ыдыктыг чүүлдер дээш ээ-харыысалгалыг турган.

²⁹ Кохаттан укталган төрел бөлүктер майгынның мурнуу чүкче көрүнген талазынга турлагжып аар турган.

³⁰ Кохаттың үре-салгалының баштыңы – Узиилдиң оглу Элицафан.

³¹ Оларга хайгаараар кылдыр дагзып турар чүүлдер бо-дур: ыдыктыг аптара, ширээ, чырыткы, өргүл салыр бедигээштер, Бурганга бараан болурда ажыглаар ыдыктыг савалар база көжеге. Оларның кылыр ажылы шак ол чүүлдер-биле холбаалыг.

³² А левиттерниң баштыңнарының даргазы – Аарон бараалгакчының оглу Элеазар. Ыдыктыг чүүлдер дээш ээ-харыысалгалыг улус ооң хайгааралының адаанда турар.

³³ Мерариден укталган төрел бөлүктер: махли биле муши; олар Мерариниң төрел бөлүктери-дир.

³⁴ Оларны санаарга, бир айдан өрү назылыг эр улустуң ниити саны 6200 кижи болган.

³⁵ Мерариниң үре-салгалының баштыңы – Авихаилдиң оглу Цуриил. Ол төрел бөлүктер майгынның соңгу чүкче көрүнген талазынга турлагжып аар турган.

³⁶ Мерариниң үре-салгалынга хайгаараар кылдыр дагзып турар чүүлдер бо-дур: майгынны тудуп турар рамкалар, доора оорга ыяштар, адагаштар, дөжектер болгаш майгынның эт-херекселдери; оларның кылыр ажылы ол чүүлдер-биле холбаалыг.

³⁷ Ол ышкаш даштыкы херимниң бүгү талаларында адагаштарны, оларның дөжектерин, өргеннерин болгаш хендирлерин база хайгаарап турганнар.

³⁸ А Ужуражылга майгынының мурнунга, ооң чөөн чүкче көрүнген талазынга Моисей база Аарон оолдары-биле турлагжып аар турган. Оларга израиль чоннуң өмүнээзинден ыдыктыг өргээге албан-хүлээлге күүседирин хүлээндирген; ыдыктыг черже чоокшулап келген өске кижини өлүрүп каар ужурлуг.

³⁹ Моисей биле Аароннуң Дээрги-Чаяакчының дужааганын ёзугаар санап кааны, бир айдан өрү назылыг эр левиттерниң ниити саны 22 000 кижи болган.

Дун оолдарны садып хостааны

⁴⁰ Дээрги-Чаяакчы Моисейге: «Израиль чоннуң бир айдан өрү назылыг шупту дун оолдарын санаашкынче киирип, даңзылап каг.

⁴¹ А левиттерни Меңээ аңгылап бараалгат, израиль чоннуң шупту дун оолдарының орнунга – левиттерни, израильчилерниң шупту дун бооп төрүттүнген мал-маганының орнунга – левиттерниң мал-маганын алыр мен» – деп чугаалаан.

⁴² Моисей Дээрги-Чаяакчының дужааганын ёзугаар израиль чоннуң шупту дун оолдарын санап каан.

⁴³ Санаашкын кылырга, бир айдан өрү назылыг дун оолдарның ниити саны 22 273 кижи болган.

⁴⁴ Дээрги-Чаяакчы Моисейге мынча деп чугаалаан:

⁴⁵ «Израиль чоннуң шупту дун оолдарының орнунга левиттерни, а мал-маганының орнунга – левиттерниң мал-маганын аңгылап ал, левиттер Меңээ хамаарышсын. Мен – Дээрги-Чаяакчы-дыр мен.

⁴⁶ А израиль чоннуң дун оолдары дээш алыр, левиттерниң санындан артып турар 273 кижи дээш садыызы мындыг болур:

⁴⁷ бир кижи дээш-ле беш шекел мөңгүнден чыып аар сен – ыдыктыг черге ажыглаар шекелди ажыглап, деңзиле. (Бир шекелдиң деңзизи чээрби герага дең болур.)

⁴⁸ Ол мөңгүннү Ааронга болгаш ооң оолдарынга израиль чонда артып турар улусту садып хостаар кылдыр бериптер сен».

⁴⁹ Моисей левиттер-биле солуурга, саны артып турар дун оолдар дээш садыызы кылдыр берген мөңгүннү ап алган.

⁵⁰ Ол израильчилерниң дун оолдары дээш ыдыктыг черге ажыглаар 1365 шекел деңзилиг мөңгүннү чыып алган.

⁵¹ Моисей Дээрги-Чаяакчының аңаа дужаал берген сөзүнүң аайы-биле садыызы болган мөңгүннү Ааронга болгаш ооң оолдарынга хүлээдип берген.