Саннар 26 - Ыдыктыг Библия

Израиль чоннуң ийиги чизе-бүрүткели

¹ Шак ол айыыл-халап эрте берген соонда, Дээрги-Чаяакчы Моисейге база Аароннуң оглу Элеазар бараалгакчыга:

² «Бүгү израиль ниитилелдиң санаашкынын кылып калыңар, чээрби хардан өрү назылыг, Израильде шериг албаны эрттирип шыдаар шупту эр улусту төрел бөлүктер барымдаалап санаңар» – деп чугаалаан.

³ Моисей биле Элеазар бараалгакчы ол үеде Моавтың ховуларынга, Иордан хемниң кыдыынга, Иерихоннуң дужунга турлагжып турган израиль чонга:

⁴ «Дээрги-Чаяакчының Моисейге дужааганын ёзугаар чээрби хардан өрү назылыг шупту эр улусту санаңар» – деп чугаалаан. Египет черден үнүп келген израиль чоннуң сан-даңзызы бо-дур.

⁵ Израильдиң улуг оглу Рувимниң үре-салгалы болгаш олардан укталган төрел бөлүктер бо-дур: Энохтан – энох төрел бөлүк, Фаллудан – фаллу төрел бөлүк,

⁶ Хецрондан – хецрон төрел бөлүк, Хармиден – харми төрел бөлүк.

⁷ Рувимден укталган төрел бөлүктер ол-дур. Оларның ниити саны 43 730 эр кижи болган.

⁸ Фаллунуң бир оглун Элиав дээр турган.

⁹ А Немуил, Дафан болгаш Авирон олар Элиавтың оолдары турган. Дафан биле Авирон дээрге израиль ниитилелден шилиттинген, Моисей биле Ааронга удур үймээн үндүрүп, Дээрги-Чаяакчыга удур тура халаан Корахка болгаш ооң талалакчыларынга каттышкан улус ол чүве-дир.

¹⁰ Ынчан чер, аксын аазадыпкан дег, оларны болгаш Корахты ажырыпкан, оларның хамык талалакчылары база өлүп калган, от 250 кижини чипкен; олар ынчан израиль чонга сагындырыышкын болу берген турган.

¹¹ Ынчалза-даа Корахтың оолдары өлбейн барган чүве-дир.

¹² Симеоннуң үре-салгалы болгаш олардан укталган төрел бөлүктер бо-дур: Немуилден – немуил төрел бөлүк, Яминден – ямин төрел бөлүк; Яхинден – яхин төрел бөлүк,

¹³ Зерахтан – зерах төрел бөлүк, Саулдан – саул төрел бөлүк.

¹⁴ Симеоннуң аймаанда төрел бөлүктер ол-дур. Оларның ниити саны 22 200 эр кижи болган.

¹⁵ Гадтың үре-салгалы болгаш олардан укталган төрел бөлүктер бо-дур: Цефондан – цефон төрел бөлүк, Хаггиден – хагги төрел бөлүк, Шуниден – шуни төрел бөлүк,

¹⁶ Озниден – озни төрел бөлүк, Эриден – эри төрел бөлүк,

¹⁷ Ародтан – арод төрел бөлүк, Арелиден – арели төрел бөлүк.

¹⁸ Гадтың үре-салгалындан укталган төрел бөлүктер ол-дур. Оларның ниити саны 40 500 эр кижи болган.

^19-20 Иуданың үре-салгалы болгаш олардан укталган төрел бөлүктер бо-дур (ооң Ир биле Онан деп ийи оглу база турган, ынчалза-даа олар ханаан черге өлүп калганнар): Шеладан – шела төрел бөлүк, Фарестен – фарес төрел бөлүк, Зерахтан – зерах төрел бөлүк.

²¹ Фарестиң төрел бөлүктери бо-дур: Хецрондан – хецрон төрел бөлүк, Хамулдан – хамул төрел бөлүк.

²² Иудадан укталган төрел бөлүктер ол-дур. Оларның ниити саны 76 500 эр кижи болган.

²³ Иссахарның үре-салгалы болгаш олардан укталган төрел бөлүктер бо-дур: Толадан – тола төрел бөлүк, Фувадан – фува төрел бөлүк,

²⁴ Иашувтан – иашув төрел бөлүк, Шимрондан – шимрон төрел бөлүк.

²⁵ Иссахардан укталган төрел бөлүктер ол-дур. Оларның ниити саны 64 300 эр кижи болган.

²⁶ Завулоннуң үре-салгалы болгаш олардан укталган төрел бөлүктер бо-дур: Середтен – серед төрел бөлүк, Элондан – элон төрел бөлүк, Яхлеилден – яхлеил төрел бөлүк.

²⁷ Завулондан укталган төрел бөлүктер ол-дур. Оларның ниити саны 60 500 эр кижи болган.

²⁸ Иосиф Манассия биле Эфрем деп ийи оолдуг турган, оларның үре-салгалы болгаш олардан укталган төрел бөлүктер бо-дур.

²⁹ Манассияның төрел бөлүктери бо-дур: Махирден – махир төрел бөлүк, Махирниң оглу Галаадтан – галаад төрел бөлүк.

³⁰ Галаадтың үре-салгалындан укталган өске төрел бөлүктер бо-дур: Иезерден – иезер төрел бөлүк, Хелектен – хелек төрел бөлүк,

³¹ Асриилден – асриил төрел бөлүк, Шехемден – шехем төрел бөлүк,

³² Шемидадан – шемида төрел бөлүк, Хеферден – хефер төрел бөлүк.

³³ Хеферниң оглу Салпаад оолдары чок, а чүгле кыстарлыг кижи турган, ооң кыстарының аттары бо-дур: Махла, Ноа, Хогла, Милка болгаш Тирца.

³⁴ Манассиядан укталган төрел бөлүктер ол-дур. Оларның ниити саны 52 700 эр кижи болган.

³⁵ Эфремниң үре-салгалы болгаш олардан укталган төрел бөлүктер бо-дур: Шутелахтан – шутелах төрел бөлүк, Бехерден – бехер төрел бөлүк, Тахандан – тахан төрел бөлүк.

³⁶ А Шутелахтың оглу Арандан – аран төрел бөлүк.

³⁷ Эфремниң үре-салгалындан укталган төрел бөлүктер ол-дур. Оларның ниити саны 32 500 эр кижи болган. Иосифтиң үре-салгалындан укталган төрел бөлүктер ол-дур.

³⁸ Вениаминниң үре-салгалы болгаш олардан укталган төрел бөлүктер бо-дур: Беладан – бела төрел бөлүк, Ашбелден – ашбел төрел бөлүк, Ахирамдан – ахирам төрел бөлүк,

³⁹ Шуфамдан – шуфам төрел бөлүк, Хуфамдан – хуфам төрел бөлүк.

⁴⁰ Бела Ард биле Нееман деп ийи оолдуг турган; Ардтан – ард төрел бөлүк, Неемандан – нееман төрел бөлүк укталган.

⁴¹ Вениаминниң үре-салгалы болгаш олардан укталган төрел бөлүктер ол-дур. Оларның ниити саны 45 600 эр кижи болган.

⁴² Данның үре-салгалы болгаш олардан укталган төрел бөлүктер бо-дур: Шухамдан – шухам төрел бөлүк; Данның төрел бөлүк аайы-биле үре-салгалы ол-дур.

⁴³ Шухамдан укталган төрел бөлүк ол-дур. Оларның ниити саны 64 400 эр кижи болган.

⁴⁴ Асирниң үре-салгалы болгаш олардан укталган төрел бөлүктер бо-дур: Имнадан – имна төрел бөлүк, Ишвадан – ишва төрел бөлүк, Бриядан – брия төрел бөлүк.

⁴⁵ Бриядан укталган өске төрел бөлүктер бо-дур: Хеверден – хевер төрел бөлүк, Малхиилден – малхиил төрел бөлүк.

⁴⁶ Асирниң Серах деп аттыг уруу база турган.

⁴⁷ Асирниң үре-салгалындан укталган төрел бөлүктер ол-дур. Оларның ниити саны 53 400 эр кижи болган.

⁴⁸ Неффалимниң үре-салгалы болгаш олардан укталган төрел бөлүктер бо-дур: Яхцеилден – яхцеил төрел бөлүк, Гуниден – гуни төрел бөлүк,

⁴⁹ Иецерден – иецер төрел бөлүк, Шиллемден – шиллем төрел бөлүк.

⁵⁰ Неффалимниң үре-салгалындан укталган төрел бөлүктер ол-дур. Оларның ниити саны 45 400 эр кижи болган.

⁵¹ Ынчалдыр түңнеп кээрге, израиль чоннуң ниити саны 601 730 эр кижи болган.

⁵² Дээрги-Чаяакчы Моисейге мынча деп чугаалаан:

⁵³ «Бо аймактарга черни, санаашкынны эрткен кижилер санын барымдаалап, үлүглей хуваар ужурлуг.

⁵⁴ Хөй санныг аймак хувааглыг черниң улуг кезээн, а эвээш санныг аймак – эвээш кезээн алзын. Аймак бүрүзүнге хувааглыг черни, ооң санаашкынны эрткен улузунуң санын барымдаалап, бээр ужурлуг.

⁵⁵ Төлге даштары октааш, кымның каяа чурттаарын тодарадыр ужурлуг, улус ада-өгбелеринден укталган аймактарының адын эдилээн хувааглыг черлерни алзын.

⁵⁶ Хөй санныг-даа, эвээш санныг-даа аймакка черни төлге даштары октааш, үлүглей хуваар ужурлуг».

Левиттерниң санаашкыны

⁵⁷ Төрел бөлүктер аайы-биле левиттерде санаашкын эрткен улус бо-дур: Гирсондан – гирсон төрел бөлүк, Кохаттан – кохат төрел бөлүк, Мерариден – мерари төрел бөлүк.

⁵⁸ Левийден укталган өске төрел бөлүктер бо-дур: ливни төрел бөлүк, хеврон төрел бөлүк, махли төрел бөлүк, муши төрел бөлүк, корах төрел бөлүк. А Амрам Кохаттан укталган турган.

⁵⁹ Амрамның кадайының адын Иохаведа дээр чүве-дир, ол херээжен Левийниң уруу, Египетке Левийниң аймаанга төрүттүнген кижи турган. Иохаведа бодунуң ашаа Амрамга Ааронну, Моисейни болгаш ол ийи оолдуң угбазы Мариамны божуп берген.

⁶⁰ Аарон болза Надав, Авиуд, Элеазар болгаш Ифамар оларның ачазы турган.

⁶¹ Надав биле Авиуд Дээрги-Чаяакчының мурнунга Ооң таарымчалыг деп көрбээни от салгаш, өлүп калган.

⁶² Левиттерниң ниити саны – бир айдан өрү назылыг – 23 000 эр кижи болган. Оларны израиль чон-биле катай санаваан, чүге дээрге израиль чоннуң аразынга оларга хувааглыг чер бербээн турган.

⁶³ Моисей биле Элеазар бараалгакчының санап каан улузу ол-дур. Израиль чон Моавтың ховуларынга, Иордан хемниң кыдыынга, Иерихоннуң дужунга турлагжып турда, олар санаашкынны кылып чоруткан.

⁶⁴ Ол улустуң аразында Моисей биле Аарон бараалгакчы израиль чонну Синай ховузунга санап турда, чизе-даңзыже кирген улустуң чаңгызы-даа чок болган.

⁶⁵ Чүге дээрге Дээрги-Чаяакчы ынчангы салгалдың улузу ээн кургаг ховуга өлүп каарын чугаалаан. Олардан чүгле Иефоннийниң оглу Халев биле Нуннуң оглу Иисус дириг арткан.