Саннар 25 - Ыдыктыг Библия

Израильдиң дүрзү-бурганнарга мөгейип турганы

¹ Израиль чон Ситтимге турлагжып алган турда, израиль эр улус моав кыстар-биле самыын харылзаа тудуп эгелээн.

² Моав кыстар боттарының бурганнарынга өргүл салып тура, израиль эр улусту чалап аарга, олар өргүл малының эъдин чип, моав бурганнарга мөгейип эгелээннер.

³ Израиль чон Фегор дагның бурганы Ваалче чайгыла бээрге, Дээрги-Чаяакчының килеңи Израильге удур кыптыга берген.

⁴ Дээрги-Чаяакчы Моисейге: «Чоннуң шупту даргаларын эккеп алгаш, оларны чырыкта, хөйге көзүлдүр өлүргеш, мага-боттарын Дээрги-Чаяакчының мурнунга азып каг. Мээң килеңим ынчан Израильден чайлай бээр» – дээн.

⁵ Моисей израиль баштыңчыларга: «Кижи бүрүзү бодунуң аймаанда Фегорнуң бурганынче чайгыла берген улусту өлүрүп кагзын» – дээн.

⁶ Моисей биле бүгү израиль чон Ужуражылга майгынынче кирер чер чанынга качыгдап ыглажып турган үеде, бир израиль кижи чедип келгеш, Моисей биле бүгү израиль ниитилел көрүп турда, бодунуң дөргүл-төрели улуска мадиан херээжен кижини эккеп көргүскен.

⁷ Аарон бараалгакчының оглу Элеазарның оглу Финеес болган чүүлдү көрүп кааш, чон аразындан үнгеш, холунга чыдазын тудуп алгаш,

⁸ демги израиль эр кижиниң соондан ооң майгынынче киргеш, эр-херээжен ийи кижини каътташтыр өттүр шанчып каан. Чыда херээжен кижиниң иштинче кадалы берип, олар иелээ өлүп калган. Ынчан израиль чонну кырып турган айыыл-халап соксай берген.

⁹ А ол айыыл-халаптан шупту 24 000 кижи өлген чүве-дир.

¹⁰ Дээрги-Чаяакчы Моисейге мынча деп чугаалаан:

¹¹ «Аарон бараалгакчының оглу Элеазарның оглу Финеес Мээң килеңимни израиль чондан чайладыпты; ол Мен дээш хүннээшкинин улус аразынга көргүстү, ынчангаш израиль чонну Бодумнуң хүннээшкиним дээш узуткавайн бардым;

¹² ынчангаш мону чугаала. Мен Финеес-биле эп-найыралдың дугуржулгазын чарып тур мен.

¹³ Ол дугуржулга дээрге аңаа болгаш ооң үре-салгалынга кезээ мөңгеде Бурганның бараалгакчылары бооп артарының дугуржулгазы-дыр, чүге дээрге ол бодунуң Бурганы дээш хүннээчел хамаарылга көргүзүп, израиль чондан Мээң килеңимни чайладып кагды».

¹⁴ Мадиан херээжен-биле кады өлүрткен израиль эр кижи Симеоннуң аймаанда бир төрел бөлүктүң баштыңы турган, ооң ады – Салунуң оглу Зимри чүве-дир;

¹⁵ а өлүртүп каан мадиан херээженниң ады – Хазва чүве-дир; ол херээжен мадиан аймактарның бирээзиниң баштыңы Цур деп кижиниң уруу турган.

¹⁶ Дээрги-Чаяакчы Моисейге мынча деп чугаалаан:

¹⁷ «Мадиан чон-биле өжээннежип, оларны узуткаңар,

¹⁸ чүге дээрге олар силерниң дайзыннарыңар болу берген, сагыжы кара болгаш, силерни Фегорнуң бурганы-биле база мадиан баштың кижи уруу Хазва деп херээжен-биле дуурайлап алган улус-тур». Фегорнуң бурганынга мөгейген дээш, чонну айыыл-халап-биле кырып турган хүнде ол херээженни өлүрүп каан чүве-дир.