Саннар 24 - Ыдыктыг Библия

¹ Валаам Дээрги-Чаяакчының сеткилинге Израильди йөрээри тааржырын көрүп кааш, ооң мурнунда дег, өскээр төлгелеп барбайн, арнын ээн кургаг ховуже угландырып келген.

² Валаам ынаар көрүпкеш, аймактар аайы-биле турлагжып алган Израильди көрүп каан. Ынчан Бурганның Сүлдези Валаамны бүргептерге,

³ ол мынча деп чеченчидир медеглээн: «Беорнуң оглу Валаам чугаалап тур, өттүр көөр кижи чугаалап тур;

⁴ Бурганның сөстерин дыңнап турар, Күчүлүг Бурганның чорутканы көстүүшкүннү көрүп турар кижи чугаалап тур; ол кижи доңгая кээп дүшкеш, өттүр көрүп турар.

⁵ Иаков, чадырларың чараш-каазын, Израиль, оран-саваңның чараш-каазын!

⁶ Олар шынаалар ышкаш чаттыла берген-дир, хем кыдыында сесерликтер дег-дир, Дээрги-Чаяакчының тарып кааны алоэ үнүштери дег-дир, суг кыдыында үнген пөштер дег-дир.

⁷ Израильдиң суу кочалдарның эриин ажа бээр, үрезини арбын суглар эриинге өзүп үнер; ооң хааны Агагтан өндүр бедик болур, ооң күрүнези көдүрлүр.

⁸ Бурган ол чонну Египеттен үндүрүп эккелген. Ол чон черлик буга дег күчү-күштүг, ол бодунуң дайзыннары болур чоннарны сыырыптар, оларның сөөктерин чуура шаап кааптар, согуннары-биле өттүр адып кааптар.

⁹ Израиль дүрлүп чыдып алган арзылаң азы араатан аң дег – ону кым дүвүредип диттир боор! Израиль, сени йөрээген кижи йөрээттирер, сеңээ каргыш салган кижи каргаттырар».

¹⁰ Валактың килеңи Валаамче хайныгып, холдарын час кылдыр часкапкаш, Валаамга: «Дайзыннарымче каргыш салзын дээш сени кыйгыртып алдым чоп, а сен оларны ам мырыңай үш катап йөрээп кагдың!

¹¹ Аал-ораныңче дүрген чана бер. Мен сеңээ хүндүткел көргүзер бодадым, ынчалза-даа Дээрги-Чаяакчы алдар-хүндүнү сенден чайладып тур» – дээн.

Валаамның сөөлгү өттүр билген медеглели

¹² Валаам ынчан Валакка мынча дээн: «Менче айбылап чорудуп турган улузуңга:

¹³ „Валак хаан меңээ алдын, мөңгүн долу ордузун-даа бээр болза, Дээрги-Чаяакчының айтыышкынын үреп, бодумнуң турам-биле эки-даа, багай-даа чүве кылып шыдавас мен, Дээрги-Чаяакчы чүү дээр болдур, ону чугаалаар мен“ – деп чугаалаважык мен бе?

¹⁴ А ам бодумнуң чонумче чанарым ол-дур. Адыр, израиль чон сээң чонуңну келир үеде канчаптарын сагындырып чугаалап берейн».

¹⁵ Валаам оон чеченчидир медеглээн: «Беорнуң оглу Валаам чугаалап тур, өттүр көөр кижи чугаалап тур;

¹⁶ Бурганның сөстерин дыңнап турар, Дээди Өрүкүнүң бодалдарын билип турар, Күчүлүг Бурганның чорутканы көстүүшкүннү көрүп турар кижи чугаалап тур; ол кижи доңгая кээп дүшкеш, өттүр көрүп турар.

¹⁷ Мону көрүп тур мен, ынчалза-даа амгы үеде болбайн турар-дыр, мону көрүп тур мен, ынчалза-даа ырак үеде боттаныр-дыр. Иаковтуң үре-салгалындан шолбан сылдыс чырып үнүп кээр, Израильден чагырыкчы көдүрлүп кээр; ол чагырыкчы Моавтың кастыын чылча базар, Сифтиң шупту үре-салгалын чылча шавар.

¹⁸ Эдом эжеледип аар, Сеир бодунуң дайзыннарынга эжеледип аар, а Израиль күчү-күжүн көргүзер.

¹⁹ Иаковтуң салгакчызы чагырыкчы апаар, хоорайларга чаштыр дээш дезе берген улусту ол узуткап каар».

²⁰ Валаам амалик чонну көрүп кааш: «Чоннар аразында бир дугаар чон – амалик-тир, ынчалза-даа ооң төнчүзү – бүрүнү-биле узуткаттырары-дыр» – деп чеченчидир медеглээн.

²¹ Оон ол кен чонну көрүп кааш: «Сээң чурттап турар чериң айыыл чок-тур, сээң уяңны хаяда туткан-дыр,

²² ынчалза-даа кен чонну хоозурадып кааптар, Ассирия сени тудуп алгаш баар үе чедип кээр» – деп чеченчидир медеглээн.

²³ Валаам оон ыңай: «Аа халак, Бурган ол бүгүнү кылырга, кым амылыг артар боор!

²⁴ Китт чон бодунуң черинден корабльдар-биле эжиндирип келгеш, Ассирияны-даа, Еверниң үре-салгалын-даа чагырып аар, ынчалза-даа олар боттары база бүрүнү-биле узуткаттырар!» – деп чеченчидир медеглээн.

²⁵ Валаам аал-оранынче чанып чорупкан; а Валак база бодунуң оруу-биле чоруй барган.