Саннар 23 - Ыдыктыг Библия

¹ Валаам Валакка: «Меңээ борта өргүл салыр чеди бедигээштен тудуп бер база чеди бугажык биле чеди кошкардан эккеп сал» – дээн.

² Валак Валаамның сөзүн ёзугаар кылган. Олар иелээ бир өргүл бедигээжинге-ле бир бугажык биле бир кошкарны салып кааннар.

³ Валаам ынчан Валакка: «Өргүлдериң чанынга артып кал, а мен өскээр баргаш кээйн, Дээрги-Чаяакчы меңээ уткуштур чедип келгеш, сеңээ медээлээр ужурлуг чүүлүмнү көргүзүп бээр чадавас» – дээш, өске бедик тас черже чорупкан.

⁴ Бурган Валаамга ужуражып кээрге, Валаам Аңаа: «Өргүл салыр чеди бедигээш белеткедим, бир бедигээште-ле бир бугажык биле бир кошкарны салып кагдым» – дээн.

⁵ Дээрги-Чаяакчы ынчан Валаамга чүнү чугаалаар ужурлуун айтып бергеш: «Валакче дедир баргаш, ынча деп чугаалаар сен» – дээн.

⁶ Валаам Валакче ээп кээрге, оозу ам-даа Моавтың бүгү нояннары-биле кады өргүлдер чанында турар болган.

⁷ Валаам чеченчидир медеглеп эгелээн: «Валак мени арамей чурттан, Моавтың хааны мени чөөн чүкте даглардан бээр эккеп: „Чедип кээп көр, меңээ дузалап, Иаковка каргыштан салып көр, чедип кээп көр, Израильди каргап көр“ – диди.

⁸ Ынчалза-даа канчап каргыш салыр мен? Бурган ол чонну каргавас-тыр. Мен канчап каргаар мен? Дээрги-Чаяакчы аңаа каргыш салбас-тыр.

⁹ Ол чонче хаяларлыг даг бажындан көрүп тур мен, ону тейлер кырындан хайгаарап тур мен; ол чон аңгы чурттап турар, өске чоннарны боду-биле дең кылдыр көрбес-тир.

¹⁰ Иаковтуң элезин дег хөй чонун кым санап шыдаарыл, Израильдиң дөрттүң бир кезиин безин кым санап үндүрерил? Мээң чуртталгам мөзүзү эки улустуң чуртталгазы дег төнзүн, мээң сөөлгү шагым оларныы ышкаш болзун!»

¹¹ Валак тургаш: «Мени канчап турарың ол? Дайзыннарымны каргазын дээш сени эккеп алдым чоп, а сен оларны йөрээп кагдың!» – дээн.

¹² А Валаам: «Дээрги-Чаяакчы меңээ чүү деп чугаалаарын айтыр болдур, ону ол олчаан чугаалаар ужурлуг мен» – деп харыылаан.

Валаамның ийиги йөрээшкини

¹³ Валак аңаа: «Мээң-биле кады өске черже бараалы. Оортан ол чоннуң өске кезик-чамдыызын көрүп каар сен, а шуптузун көрбес сен. Меңээ дузалап, оларны ол черден каргап көр!» – деп чугаалаан.

¹⁴ Валак Валаамны Фасги сынның кырында Цофим оргулаажынче эккелгеш, аңаа өргүл салыр чеди бедигээш туткаш, бир бедигээшке-ле бир бугажык биле бир кошкарны салып каан.

¹⁵ Валаам ынчан Валакка: «Маңаа, өргүлүң чанынга артып кал, а мен Бурган-биле ужурашкаш кээйн» – деп чугаалаан.

¹⁶ Дээрги-Чаяакчы Валаам-биле ужуражып, ооң чүү деп чугаалаар ужурлуун айтып бергеш: «Валакка дедир баргаш, ынча деп чугаалаар сен» – дээн.

¹⁷ Валаам Валакче ээп кээрге, оозу ам-даа Моавтың нояннары-биле кады өргүлдер чанында турар болган. Валак демгизинден: «Дээрги-Чаяакчы чүү диди?» – деп айтырган.

¹⁸ Валаам чеченчидир медеглээн: «Кичээнгейлиг дыңна, Валак, кулааң менче ээктир, Сепфорнуң оглу!

¹⁹ Бурган дээрге кижи эвес-ле болгай, Ол чүү дээш мегелээрил? Бурган дээрге кижи амытан эвес-ле болгай, Ол чүү дээш өскээр бодай бээрил? Ол эткен сөзүн ээлевейн барбас, аазаан соонда, күүсетпейн барбас.

²⁰ Бо чонну йөрээп каар даалга алган мен. Бурган Боду бо чонну йөрээп каан-дыр, а мен ону өскертип шыдавас мен.

²¹ Иаков-биле айыыл-халап болбас-тыр, Израильде багай чүве чок бооп турар-дыр. Ооң Бурганы Дээрги-Чаяакчы Бодунуң чону-биле-дир, чон Ооң дугайында „Хаанывыс!“ деп чарлап чугаалап турар-дыр.

²² Бурган оларны Египеттен үндүрүп эккелген, олар черлик буга дег күчү-күштүг улус-тур.

²³ Иаковка удур илби-шиди кылган ажыы чок, Израильге удур караң көрүнген ажыы чок. Үези кээрге, улус Иаковтуң дугайында: „Бурганның Израильге кылган чүвези бо-дур!“ – деп чугаалажыр.

²⁴ Ол чон – арзылаң ышкаш туруп кээр, араатан аң ышкаш көдүрлүп кээр, олчазын дойлап чивээнде база өлүрткеннерниң ханы-биле суксунун хандырбаанда, дыштанып чыдарын билбес чон-дур».

²⁵ Валак ынчан Валаамга: «Ол чонга каргыш салып, каргавас болзуңза, оода йөрээл салып, оларны йөрээве!» – дээн.

²⁶ Валаам тургаш: «Мен чүгле Дээрги-Чаяакчының меңээ чугаалаан бүгү чүвезин кылырымны сеңээ чугаалаважык мен бе?» – деп харыылаан.

Валаамның үшкү йөрээшкини

²⁷ Валак ынчан Валаамга: «Өске черже кады барып көрээли, канчап билир, демги чонга ол черден каргыш салырың Бурганга эки бооп көстүр чадавас» – дээн.

²⁸ Валак Валаамны Фегор дагның ээн кургаг ховуже көрүнген бажынче үндүре берген.

²⁹ Валаам: «Меңээ борта өргүл салыр чеди бедигээштен тудуп бер база чеди бугажык биле чеди кошкардан эккеп сал» – деп Валакка чугаалаан.

³⁰ Валак Валаамның чугаалаанын ёзугаар күүседип, бир өргүл бедигээжинге-ле бир бугажык биле бир кошкарны салып каан.