Саннар 2 - Ыдыктыг Библия

Турлагжыырының дүрүмнери

¹ Дээрги-Чаяакчы Моисей биле Ааронга мынча деп чугаалаан:

² «Израиль кижи бүрүзү бодунуң аймааның сүлде демдектериниң база тугунуң чанынга турлагжыыр ужурлуг; олар Ужуражылга майгынын долгандыр, бичии ырадыр турлагжып алзыннар.

³ Майгынның мурнунга, ооң чөөн талазынга турлагжыыр улус бо-дур. Аңаа Иуданың аймаа чурум-чыскаалдыг бөлүктер аайы-биле турлагжызын, оларның тугун аңаа ассын; ол аймактың баштыңы – Аминадавтың оглу Наассон.

⁴ Ол аймакта санаашкынны эрткен аг-шериг – 74 600 эр кижи.

⁵ Иуданың аймаа-биле кады Иссахарның аймаа турлагжып алзын, ол аймактың баштыңы – Цуарның оглу Нафанаил.

⁶ Ол аймакта санаашкынны эрткен аг-шериг – 54 400 эр кижи.

⁷ Завулоннуң аймаа база аңаа турлагжып алзын; ол аймактың баштыңы – Хелоннуң оглу Элиав.

⁸ Ол аймакта санаашкынны эрткен аг-шериг – 57 400 эр кижи.

⁹ Иуданың аймаа баштаан турлагда санаашкынны эрткен, чурум-чыскаалдыг бөлүктерге үскен эр улустуң ниити саны – 186 400 кижи. Олар көш үезинде бирги ээлчегде шимчеп үнер ужурлуг.

¹⁰ Мурнуу чүкке Рувимниң аймаа чурум-чыскаалдыг бөлүктер аайы-биле турлагжызын, оларның тугун аңаа ассын; ол аймактың баштыңы – Шедеурнуң оглу Элицур.

¹¹ Ол аймакта санаашкынны эрткен аг-шериг – 46 500 эр кижи.

¹² Рувимниң аймаа-биле кады Симеоннуң аймаа турлагжып алзын; ол аймактың баштыңы – Цури-Шаддайның оглу Шелумиил.

¹³ Ол аймакта санаашкынны эрткен аг-шериг – 59 300 эр кижи.

¹⁴ Гадтың аймаа база аңаа турлагжып алзын; ол аймактың баштыңы – Регуилдиң оглу Элиасаф.

¹⁵ Ол аймакта санаашкынны эрткен аг-шериг – 45 650 эр кижи.

¹⁶ Рувимниң аймаанга баштаткан турлагда санаашкынны эрткен, чурум-чыскаалдыг бөлүктерге үскен эр улустуң ниити саны – 151 450 кижи. Олар ийиги ээлчегде шимчеп үнер ужурлуг.

¹⁷ Ооң соонда Ужуражылга майгыны шимчеп үнүптер, левиттерниң турлаа өске турлагларның ортузунга чоруур. Олар турлагга канчаар турганыл, ол-ла туруштарын ёзугаар бар чыдар, кижи бүрүзү чыскаалды сагып, тугунуң чанындан ыравас ужурлуг.

¹⁸ Барыын чүкке Эфремниң аймаа чурум-чыскаалдыг бөлүктер аайы-биле турлагжызын, оларның тугун аңаа ассын; ол аймактың баштыңы – Аммиудтуң оглу Элишама.

¹⁹ Ол аймакта санаашкынны эрткен аг-шериг – 40 500 эр кижи.

²⁰ Эфремниң аймаа-биле кады Манассияның аймаа турлагжып алзын; ол аймактың баштыңы – Педацурнуң оглу Гамалиил.

²¹ Ол аймакта санаашкынны эрткен аг-шериг – 32 200 эр кижи.

²² Вениаминниң аймаа база аңаа турлагжып алзын; ол аймактың баштыңы – Гидеонийниң оглу Авидан.

²³ Ол аймакта санаашкынны эрткен аг-шериг – 35 400 эр кижи.

²⁴ Эфремниң аймаа баштаан турлагда санаашкынны эрткен, чурум-чыскаалдыг бөлүктерге үскен эр улустуң ниити саны – 108 100 кижи. Олар үшкү ээлчегде шимчеп үнер ужурлуг.

²⁵ Соңгу чүкке Данның аймаа чурум-чыскаалдыг бөлүктер аайы-биле турлагжызын, оларның тугун аңаа ассын; ол аймактың баштыңы – Амми-Шаддайның оглу Ахиезер.

²⁶ Ол аймакта санаашкынны эрткен аг-шериг – 62 700 эр кижи.

²⁷ Данның аймаа-биле кады Асирниң аймаа турлагжып алзын; ол аймактың баштыңы – Охранның оглу Пагиил.

²⁸ Ол аймакта санаашкынны эрткен аг-шериг – 41 500 эр кижи.

²⁹ Неффалимниң аймаа база аңаа турлагжып алзын; ол аймактың баштыңы – Энанның оглу Ахира.

³⁰ Ол аймакта санаашкынны эрткен аг-шериг – 53 400 эр кижи.

³¹ Данның аймаа баштаан турлагда санаашкынны эрткен эр улустуң ниити саны – 157 600 кижи. Олар боттарының туктарын көдүргеш, сөөлгү ээлчегде шимчеп үнер ужурлуг».

³² Төрел бөлүктер барымдаалап санаашкынны эрткен израиль чон ол-дур. Турлагларда чурум-чыскаалдыг бөлүктер аайы-биле санаашкынны эрткен эр улустуң ниити саны – 603 550 кижи.

³³ А левиттер Дээрги-Чаяакчының Моисейге дужааганын ёзугаар израиль чон-биле кады санаашкынны эртпейн барган.

³⁴ Израиль чон ол бүгүнү Дээрги-Чаяакчының Моисейге дужааганын ёзугаар күүседип, туктарының чанынга турлагжып, кижи бүрүзү бодунуң төрел бөлүү-биле, дөргүл-төрели-биле кады көжүп чоруп турган.