Саннар 19 - Ыдыктыг Библия

Арыглаашкын суу

¹ Дээрги-Чаяакчы Моисей биле Ааронга мынча деп чугаалаан:

² «Дээрги-Чаяакчының израиль чонга чагып, доктаадып каан хоойлузу бо-дур. Израильчилер сеңээ четпес-дудуу эвес, кемниг эвес, мойнунга ыяш хомут кедип көрбээн шилги инектен эккелзин.

³ Ол инекти Элеазар бараалгакчыга бериптиңер, бараалгакчы ону турлагның даштынче үндүре бээрге, боду көрүп турда, улус инекти аңаа согар ужурлуг.

⁴ Оон Элеазар бараалгакчы ооң ханынче салаазын суккаш, Ужуражылга майгынының мурнунче чеди удаа бызай чашсын.

⁵ Элеазар көрүп турда, демги инекти өрттетсин: ооң кежин, эъдин болгаш ханын чини-биле кады өрттетсин.

⁶ Бараалгакчы пөш будуун, иссоп дээр үнүштү, кызыл удазынны өрттедип турар инекче октапсын.

⁷ Бараалгакчы хептерин чуп алзын база мага-бодун сугга чуп алзын, ооң соонда турлагже кирип болур; ол кежээге чедир арыг эвес болур.

⁸ Инекти өрттедип турган кижи база хептери биле мага-бодун сугга чуп алзын; ол кижи кежээге чедир арыг эвес болур.

⁹ Өске-бир арыг кижи инектиң хүлүн чыггаш, турлагның даштында арыг черге салып кагзын – ол хүлдү арыглаашкын суунга ажыглаары-биле израиль чон кадагалазын. Бачыт дээш өргүл ол-дур.

¹⁰ Инектиң хүлүн чыгган кижи хептерин чуп алзын; ол кижи кежээге чедир арыг эвес болур. Ол дээрге израиль чонга база оларның аразында чурттап турар даштыкы улуска кезээ мөңгеде доктаадып каан дүрүм-дүр.

¹¹ Кандыг-бир өлүг кижиниң мага-бодунга дегген кижи чеди хүн дургузунда арыг эвес болур.

¹² Ол кижи бо арыглаашкын суу-биле үшкү база чедиги хүнде бачыттан арыгланып аар болза, арыг деп санаттырар; а үшкү база чедиги хүнде бодун арыгланып албас болза, арыг эвес артар.

¹³ Өлүг кижиниң мага-бодунга деггеш, бодун арыгланып албаан кандыг-даа кижи Дээрги-Чаяакчының өргээзин бужартадып турары ол-дур, ол кижи израиль чоннуң аразынга амылыг артпас, чүге дээрге арыглаашкын суун олче чашпаан-дыр, ол кижи арыг эвес бооп артпышаан-дыр.

¹⁴ Бир-ле кижи оран-савазынга өлүп калган болза, мындыг дүрүмнү ажыглаар. Ооң чадырында турар бүгү улус база ынаар кирип кээр кандыг-даа кижи чеди хүн дургузунда арыг эвес болур.

¹⁵ Халывын быжыглай шарываан кандыг-даа ажык сава арыг эвес болур.

¹⁶ Ажык черге тургаш, азы кижи холундан өлген кижиге, азы бодунуң өлүмү-биле өлген кижиге, азы өлүг кижиниң сөөктеринге, азы өлүг кижи хааржаанга дегген кижи чеди хүн дургузунда арыг эвес болур.

¹⁷ Арыг эвес кижини арыглаары-биле демги өрттеткен, бачыт дээш өргүл болган инектиң хүлүн узуп алгаш, саваже ургаш, ынаар агым сугдан кудуп кагзын.

¹⁸ Оон кандыг-бир арыг кижи иссоптан ап алгаш, ону сугже суккаш, чадырже болгаш ында турар шупту саваларже, кижилерже база азы өлүг кижиниң сөөктеринге, азы өлүрткен кижиге, азы боду өлген кижиге, азы өлүг кижи хааржаанга дегген кижиже бызай чашсын.

¹⁹ Арыг кижи үшкү база чедиги хүнде арыг эвес кижиже сугну бызай чажарга, ол чедиги хүнде бачыттан арыг болу бээр. Арыг эвес турган кижи хептерин база мага-бодун сугга чуп алзын, оон кежээликтей арыг болу бээр.

²⁰ А арыг эвес болу бергеш, бачыттан арыгланып албаан кижини чон аразынга амылыг арттырбас ужурлуг, чүге дээрге ол кижи Дээрги-Чаяакчының ыдыктыг өргээзин бужартаткан-дыр, арыглаашкын суун бодунче чаштыртпаан-дыр, арыг эвес бооп арткан-дыр.

²¹ Израильчилерге ол дүрүмнү кезээ мөңгеде доктаадып каан болзун. Арыглаашкын суун бызай чажып турган кижи хептерин чуп алзын; арыглаашкын суунга дегген кижи кежээге чедир арыг эвес болур.

²² Арыг эвес кижиниң дегген бүгү чүвези арыг эвес болу бээр; ол бүгүге дегген кижи база кежээге чедир арыг эвес болур».