Саннар 17 - Ыдыктыг Библия

Аарон – дээди бараалгакчы дээрзин Бурганның бадыткааны

¹ Дээрги-Чаяакчы Моисейге мынча деп чугаалаан:

² «Израиль чон-биле чугаалаш. Оларның аймак бүрүзүнден, аймактарның баштың бүрүзүнден бир-бир – шупту он ийи даянгыыштан ап ал, баштың бүрүзүнүң адын ооң даянгыыжынга бижип каг;

³ Аароннуң адын Левийниң аймааның даянгыыжынга бижип каг, баштың бүрүзү-ле бир даянгыыш берген турар ужурлуг.

⁴ Даянгыыштарны Мээң силер-биле ужуражып кээп турарым черге – Ужуражылга майгынында ыдыктыг аптара мурнунга эккеп салып каг.

⁵ Мээң шилип алыр баштыңымның даянгыыжы чечектели бээр. Ынчан израиль чоннуң силерже хыйланыышкынындан кулаам дыштаныр».

⁶ Моисей израиль чон-биле чугаалашкан соонда, оларның шупту баштыңнары аңаа даянгыыштарын берген. Бир баштың-на бир даянгыыш кылдыр, аймактарның санын ёзугаар он ийи даянгыышты эккелген, Аароннуң даянгыыжы оларның аразынга турган.

⁷ Моисей даянгыыштарны ыдыктыг майгынче киирип, Дээрги-Чаяакчының мурнунга салып каан.

⁸ Даартазында хүндүс Моисей майгынче кирип келгеш, көөрге, Левийниң аймаан төлээлээн Аароннуң эккелген даянгыыжының бүүрекчигештери үнүп, чечектери частып, миндаль тооруктарын берип эгелээн болган.

⁹ Моисей шупту даянгыыштарны Дээрги-Чаяакчының мурнундан бүгү израиль чонче үндүре бээрге, улус болган чүүлдү көргеш, боттарының эккеп берген даянгыыштарын ап алган.

¹⁰ Дээрги-Чаяакчы Моисейге: «Аароннуң даянгыыжын база катап ыдыктыг аптараның мурнунга салып каг – даянгыыш үймээнчи улуска сагындырыг кылдыр кадагалаттынзын, оларның хыйланыышкынындан Мээң кулаамга ынчалдыр дыш бээр сен, олар өлбейн баар» – дээн.

¹¹ Моисей Дээрги-Чаяакчы аңаа канчаар дужааганыл, ынчаар кылган.

Бараалгакчылар биле левиттерниң бараан болуушкуну

¹² Израиль чон Моисейге: «Көр даан, өлүр деп бардывыс, узуткаттырып аарывыс ол-дур, шупту өлдүвүс-ле!

¹³ Дээрги-Чаяакчының майгынынче чоокшулаан кандыг-даа кижи өлүп каар болгай. Бис база шупту өлүр бис бе?!» – деп эгелээн.