Саннар 10 - Ыдыктыг Библия

Мөңгүн трубалар

¹ Дээрги-Чаяакчы Моисейге мынча деп чугаалаан:

² «Бодуңга ийи мөңгүн трубадан хевилей соктап кылып ал – оларны чонну чыылдырарда база турлагларны көдүрүп, медээлээрде ажыглаар сен.

³ Оларны иелдирзин этси бээрге, бүгү чон Ужуражылга майгынынче кирер черге, сээң чаныңга чыглып кээр.

⁴ Трубаларның чүгле бирээзин этсирге, Израильдиң аймактар баштыңнары сээң чаныңга чыглып кээр.

⁵ А онза аялга ойнаарыңарга, чөөн чүкче көрүндүр тиктинген турлаглар көдүрлүп үнер;

⁶ онза аялганы ийи дугаар ойнаарыңарга, мурнуу чүкче көрүндүр тиктинген турлаглар көдүрлүп үнер. Чоннуң көжүп үнерин онза аялга медээлезин.

⁷ А чонну чыылдырарда база трубалар этсиңер, ынчалза-даа онза аялга ойнаваңар.

⁸ Трубаларны этсир ужурлуг улус – Аароннуң оолдары, Бурганның бараалгакчылары-дыр: силерниң келир салгалдарыңарга кезээ мөңгеде доктаадып каан хоойлу ол-дур.

⁹ Бодуңарның чериңерге силерже халдаан дайзын-биле чаалажып үнүп тура, трубаларны этсиңер, ол аялга Дээрги-Чаяакчы Бурганыңарга силерни сагындырар – Ол силерни дайзыннарыңардан камгалап каар.

¹⁰ Ол ышкаш өөрүп-хөглеп тура, байырлалдарыңар үезинде, ай чааларында база трубаларыңар этсиңер, бүрүн өрттедир өргүлдер биле эп-найырал өргүлдерин салып тура, этсиңер – ол дээрге Бурганыңарга боттарыңар дугайыңарда сагындырыг болур. Мен – Дээрги-Чаяакчы Бурганыңар-дыр мен».

Израиль чоннуң Синайдан көжүп үнгени

¹¹ Ийиги чылдың ийи айның чээрбиде булут ыдыктыг өргээден көдүрлү берген.

¹² Израиль чон Синай ховузундан көжүп чорупкан; булут оон ээн кургаг Фаран ховузунга доктаай берген.

¹³ Дээрги-Чаяакчының Моисейни дамчыштыр берген айтыышкынын ёзугаар оларның бир дугаар көжүп үнгени ол.

¹⁴ Иуданың үре-салгалының тугу эң мурнунга, чурум-чыскаалдыг бөлүктер аайы-биле көдүрлүп чорупкан; ол мөөң улусту Аминадавтың оглу Наассон баштап бар чыткан.

¹⁵ Иссахарның аймааның бөлүүн Цуарның оглу Нафанаил баштап бар чыткан.

¹⁶ Завулоннуң аймааның бөлүүн Хелоннуң оглу Элиав баштап бар чыткан.

¹⁷ Оон өргээ-майгынны бузуп каапкан соонда, ону көдүрүп дажыглаар улус – Гирсон биле Мерариниң үре-салгалы шимчеп үнүпкен.

¹⁸ Рувимниң үре-салгалының тугу чурум-чыскаалдыг бөлүктер аайы-биле көдүрлүп чорупкан; ол мөөң улусту Шедеурнуң оглу Элицур баштап бар чыткан.

¹⁹ Симеоннуң аймааның бөлүүн Цури-Шаддайның оглу Шелумиил баштап бар чыткан.

²⁰ Гадтың аймааның бөлүүн Регуилдиң оглу Элиасаф баштап бар чыткан.

²¹ Ооң соо-биле ыдыктыг чүүлдерни дажыглаан Кохаттың үре-салгалы бар чыткан. (А өргээ-майгынны оларның чаа турлагга чеде бээриниң бетинде тургузуп каар ужурлуг турган.)

²² Эфремниң үре-салгалының тугу чурум-чыскаалдыг бөлүктер аайы-биле көдүрлүп чорупкан; ол мөөң улусту Аммиудтуң оглу Элишама баштап бар чыткан.

²³ Манассияның аймааның бөлүүн Педацурнуң оглу Гамалиил баштап бар чыткан.

²⁴ Вениаминниң аймааның бөлүүн Гидеонийниң оглу Авидан баштап бар чыткан.

²⁵ Шупту ол бөлүктерниң эң соондан Данның үре-салгалының тугу чурум-чыскаалдыг бөлүктер аайы-биле көдүрлүп чорупкан; ол мөөң улусту Амми-Шаддайның оглу Ахиезер баштап бар чыткан.

²⁶ Асирниң аймааның бөлүүн Охранның оглу Пагиил баштап бар чыткан.

²⁷ Неффалимниң аймааның бөлүүн Энанның оглу Ахира баштап бар чыткан.

²⁸ Израиль чоннуң бөлүктер аайы-биле көжүп үнүп турган чурум-чыскаалы ол-дур. Олар шак ынчаар көжүп чоруп турганнар.

²⁹ Моисей Мадианның чурттакчызы, бодунуң каты Рагуилдиң оглу Ховавка: «Дээрги-Чаяакчының биске бээр бооп аазааны черже көжүп үнүп тур бис. Бистиң-биле кады чорувут, сеңээ эки хамаарылгалыг боор бис, Дээрги-Чаяакчы израиль чонга ачы-буянны аазаан-на болгай» – дээн.

³⁰ Ынчалза-даа Ховав аңаа: «Чорбас мен, бодумнуң черимче, төрел улузумче чанарым ол-дур» – деп харыылаан.

³¹ А Моисей мынча дээн: «Бисти кагбайн көрем, ээн кургаг ховуга турлагжыырывыска таарымчалыг черлерни билир-ле болгай сен, биске карак боор сен;

³² бистиң-биле кады баар болзуңза, Дээрги-Чаяакчының биске көргүзер ачы-буянындан сеңээ база көргүзер бис».

³³ Израильчилер Дээрги-Чаяакчының даандан үш хүннүң оруунче үнүпкеннер; Дээрги-Чаяакчы оларның турлагжып доктаар черин көрүп берзин дээш, Ооң ыдыктыг аптаразы үш хүн дургузунда оларга орук баштап бар чыткан.

³⁴ Олар хонган черинден көжүп үнерге, Дээрги-Чаяакчының булуду хүндүс оларны кырындан шыва ап чораан.

³⁵ Ыдыктыг аптараны орукче үндүрүп турда, Моисей: «Туруп келем, Дээрги-Чаяакчы, Сээң дайзыннарың тарай маңнажы берзин, Сени көөр хөңнү чок улус Сенден дезип ыңай болзун!» – деп турган.

³⁶ А ыдыктыг аптара доктаай бээрге, ол: «Дээрги-Чаяакчы, Израильдиң муң-сая чонунче ээп кел!» – деп турган.