Осия 8 - Ыдыктыг Библия

Израиль политиктиг база шажынчы бачыттары дээш кеземче алыр

¹ «Трубадан эдис! Израильчилер Мээң чагыг-керээмни үрээн, Мээң хоойлумга чагыртпаан боорга, Дээрги-Чаяакчының черинче эзир шүүргедеп келген дег-дир.

² Олар Менден дуза дилеп: „Бурганывыс! Израильчилер бис Сени билип алдывыс!“ – деп кыйгырар.

³ Израиль чон буяндан ойталады; дайзын ам ону истеп-сүрер.

⁴ Израильчилер хааннарны Мээң дужаалым чокка боттары дүжүлгеге олуртуп турган, нояннарны Мээң чөпшээрелим чокка шилип ап турган. Боттарының алдын-мөңгүнүнден дүрзү-бурганнар шуткуп ап турганнар, ынчангаш узуткаттырып аарлар.

⁵ Самария, сээң дүрзү-бугажыыңны хүлээп көрбедим! Мээң килеңим израильчилерже кыптыкты: кажанга чедир арыгланып ап шыдавастарыл?!

⁶ Ол бугажыкты Израиль боду кылган болгай. Ону шевер кижи шуткаан, ынчангаш ол бурган эвес-тир; Самарияның бугажыы буступ каар!

⁷ Израильчилер салгын тарып алгаш, шуурган ажаап аар; үрезин бербес сыптан далган-тараа ажаап алдынмас, далган-тараа ажааттынар-даа болза, ону хары улус чиир.

⁸ Израиль чон сыыртырып алган, ол ам өске чоннар аразында ажык чок чүүл дег.

⁹ Олар Ассирияже дуза дилеп чорупкан, чааскаан улчуп чоруур черлик элчиген ышкаш Эфрем хары улустуң ынакшылын төлевир берип тургаш, садып алган.

¹⁰ Израильчилер өске чоннарга төлевир үлеп берип турган-даа болза, Мен оларны бөле сүрүп эккээр мен, ынчан олар удавайн хары нояннарның база хаанның дарлалындан хинчек көрүп эгелээрлер.

¹¹ Эфрем бачыт дээш өргүл салыры-биле хөй-ле бедигээштер тудуп алган, а оон оларны бачыт үүлгедири-биле ажыглап турган.

¹² Мен израильчилерге Бодумнуң хөй хоойлуларымны бижип-даа берген болзумза, олар боттарынга хамааржыр кылдыр хүлээп көрбес ийик.

¹³ Олар Дээрги-Чаяакчыга өргүл кылдыр эът эккеп салгаш, чип аар. Оларның өргүлдери Меңээ таарымчалыг эвес; Мен ам оларның бузудун бодап келгеш, бачыттары дээш кезедир мен: олар Египетче эглип кээр.

¹⁴ Израиль бодунуң Чаяакчызын уттупкаш, ордулар тудуп алган-дыр; Иудея хөй быжыглалдыг хоорайлар тудуп турар-дыр, ынчалза-даа Мен ол хоорайларже отту ыдыптар мен, от ордуларны чиптер».