Осия 7 - Ыдыктыг Библия

¹ Израильди эмнээр деп баарымга, Эфремниң кем-буруузу, Самарияның бузут-багы көстү берди. Олар мегелеп турар-дыр, оорлаашкын-даа болур-дур, дээрбечи-даа улусту кудумчуларга үптээр-дир.

² Оларның бузуттуг үүлгедиглериниң шуптузун сактып алганымны медереп билбестер-дир; ам оларны ажыл-херектери бүргеп алган, оларны тода көрүп тур мен».

Эрге-чагырга тутканнарның бузуду

³ «Израильчилер боттарының бузут-багы-биле – хаанны, оп-мегези-биле – нояннарны хөгледип турар.

⁴ Олар шупту өскерликчилер-дир, оларның күзээшкиннери, хлеб быжырыкчызының суугузу дег, изип-хып тур, а хлеб быжырыкчызы суугузун чүгле далганын хоюткаш, оозу ажый бээр өйге чедир одавас болгай.

⁵ Хаанывыстың байырлалының хүнүнде нояннар аарыгыжеге чедир изиглендир ижип алган, а хаан кочуургак улусче холун сунган.

⁶ Олар боттарының кара сагыштыы-биле чүректерин суугуга дөмей кылып аар; оларның килеңи дүннү өттүр удуп хонар, а эртен ол чалбыышталган от дег кыва бээр.

⁷ Олар шупту суугу ышкаш изий бергеш, боттарының баштыңнарын сыырып турар; оларның бүгү хааннары дүжүлгелеринден кээп дүжүп турар, оларның чаңгызы-даа Менден дуза дилеп кыйгырбады.

⁸ Эфрем өске чоннар-биле холужа берген-дир, ол бир талазы чиг хаарган далган дег апарган-дыр.

⁹ Хары улус ооң күжүн чип турган, а ол эскербээн, ооң бажы көгере берген, а ол билбейн турар.

¹⁰ Израильдиң адыыргак чоруу бодунга удур херечилээр; ол бүгү болуп турда-ла, Дээрги-Чаяакчы Бурганынче ээлбес-тир, Олче чүткүвес-тир.

¹¹ Эфрем мелегей, сарыыл чок көге-буга дег-дир: дуза дилеп, бирде Египетти кыйгырып, бирде Ассирияже барып турар-дыр.

¹² Израильчилер дуза дилеп чоруптарга, Бодумнуң четкимни оларже хөме салыр мен, дээрниң куштарын дег, дүжүр октаар мен, оларның чыылганын дыңнааш, бектеп каар мен.

¹³ Менден ырай бергени дээш, олар ат болур, Меңээ удур үймээн үндүргени дээш, олар узуткаттырып аар. Ол чонну камгалаар деп турдум, а олар Мээң дугайымда меге чүве чугаалажыр-дыр.

¹⁴ Олар орун-дөжээнге човууртап чыткаш, кажан-даа боттарының сеткил-чүрээнден Менден дуза дилеп кыйгырбады; олар чыглып турза-даа, чүгле далган-тараа чииринге, арага ижеринге өйлежип, Менден ойталаар болду.

¹⁵ Оларны билиндир сургап, күш киир быжыглап турган мен, а олар Меңээ удур бак чүве бодаар-дыр.

¹⁶ Олар кымче-даа эглип кээп турду, чүгле Дээди Өрүкү Бурганче эвес; олар ыргак-дагыр согуннар дег апарды; оларның нояннары аксы-дылының каржы-багы дээш хылышка шаштырып аар, ынчан Египеттиң чону оларны кочулап-шоодар».