Осия 12 - Ыдыктыг Библия

¹ Эфрем хат кадарып, өрттендир чиир хатты сүрүп турар, хүннү бадыр мегени, хоозураашкынны көвүдедип турар. Израильчилер Ассирия-биле-даа эвилелдежип, Египетче-даа белек кылдыр олива үзү чорудуп берип турар.

² Дээрги-Чаяакчы Иудея-биле база чаргылдажып турар, Ол Иаковтуң үре-салгалынга ооң оруктары дээш, үүлгеткен херектерин барымдаалап, кеземче онаар.

³ Иаков иезиниң иштинге-ле бодунуң акызын ажып эрткен, а күш-шыдалы четчи бергеш, Бурган-биле сегиржип алган.

⁴ Ол Бурганның төлээзи-биле хүрешкеш, тиилеп кааш, Бургандан ачы-буян дилеп, ыглап турган; Вефилге Бурган аңаа ужуражып, чугаалашкан.

⁵ Дээрги-Чаяакчы – Аг-шериглиг Бурган-дыр, Ооң ат-дужаалы – Дээрги-Чаяакчы.

⁶ Сен бодуңнуң Бурганыңче эглип кел, ээ-хайыралыг база чөптүг бол, Аңаа кезээде идеге.

⁷ Хананей садыгжылар шын эвес деңзилээр деңзи тудуп алгаш, улустан чүве мегелеп чииринге ынак.

⁸ Эфрем: „Мен-даа олар ышкаш байыдым, эт-хөреңги чыып алдым. Мээң бүгү ажыл-херээмден улус хоойлуга удурланышкак, бачыт деп санадыр чүү-даа чүве тыппас“ – деп чугаалаан.

⁹ А Мен Египетке чурттап турган үеңден бээр сээң Дээрги-Чаяакчы Бурганың болгай мен; байырлалдар хүннеринде дег, сени база катап чадырларга чурттадып каар мен.

¹⁰ Мен Бодумнуң медээчилерим-биле чугаалажып, оларже чоруткан көстүүшкүннеримни көвүдедип, медээчилерни дамчыштыр чонну сагындырып турган мен.

¹¹ А Галаад бузутка бердинген-дир, ооң чону чөгенчиг улус апарган-дыр. Олар Галгалга өргүл кылдыр бугажыктар салып турган-дыр, оларның өргүл бедигээштери аңдарган шөлде оваалай чыгган даштар дег-дир.

¹² Иаков Арам дээр чуртче дезе берген; Израиль аңаа күдээлеп, кадайы дээш ажылдап берип, өгленир дээш хой кадарып турган.

¹³ Дээрги-Чаяакчы израиль чонну Египеттен медээчизин дамчыштыр үндүре бергеш, база-ла медээчизин дамчыштыр кадагалап турган.

¹⁴ Эфрем Дээргизин дыка-ла хорадаткан, өлүрүкчү чоруу дээш буруузун ол боду чүктээр, ол Дээргизин куду көрген дээш, Дээрги ооң бодун куду көрдүрер.