Осия 11 - Ыдыктыг Библия

¹ Израильдиң хааны даң хаяазында-ла өлүп каар. «Израиль аныяк турда, аңаа ынак апарган мен, Бодумнуң оглумну Египеттен үндүр кыйгырып алган мен.

Израиль чон – Бурганның ынак төлү

² Израильчилерни медээчилерим кыйгырып турда-ла, олар ырап, Ваал бурганның дүрзүлеринге өргүлдер эккеп салып, шуткуп, чазаан дүрзүлерге мөгейип, айдызаашкын кылып турганнар.

³ Мен Бодум Эфремни кылаштаарынга өөредип кагдым, холумга көдүрүп алгаш чоруп турдум, а израильчилер оларны Мээң экиртир эмнеп турарымны билбеди.

⁴ Кижизиг, ынакшылдыг харылзаалар-биле оларны хаара тудуп алган мен; оларның моюннарындан дөңгүнү ужулган дег болган мен, ээккеш, аъш-чемни оларга салып берип турган мен.

⁵ Израиль Египетче дедир ээп чоруур, Ассирия ону чагырар, чүге дээрге ол Менче эглиринден ойталаан-дыр.

⁶ Ооң хоорайларын хылыш кезе шавар – ооң хаалгазының дээктерин үреп, кара сагыштыг бодалдары дээш, израильчилерни сыырыптар.

⁷ Мээң чонум Менден ойталаарын кызып турар-дыр, медээчилерим оларны бедикче кыйгырарга-даа, өрү көдүрлүр кижи чок-тур.

⁸ Эфрем, сенден канчап ойталаар мен? Израиль, сени канчап өскелерге бериптер мен? Сени Адма хоорайны дег бак аажылаар мен бе, Цевоим хоорай-биле кылган чүвемни сеңээ хамаарыштыр кылыр мен бе? Мээң бүгү кээргелим кыптыга берди, бодал-сагыжым өскерлип,

⁹ Бодумнуң килеңим ёзугаар кылбас мен, Эфремни база катап узуткавас мен, чүге дээрге Мен – кижи эвес, а силерниң араңарда ыдыктыг Бурган мен; силерге хорадап келбес мен.

¹⁰ Израильчилер Дээрги-Чаяакчыны эдерип чоруптар, Ол арзылаң ышкаш ырланыр; Ооң ырланганын дыңнааш, ажы-төлү сырбаш дээш, барыын чүктен чедип кээр.

¹¹ Олар Египеттен – бора-хөкпеш ышкаш, Ассириядан – көге-буга ышкаш ужуп чедип кээр; оларны боттарының аал-ораннарынга чурттадып каар мен». Дээрги-Чаяакчының медеглээн чүвези ол-дур.

Иаковтуң салгалы бодунуң Бурганынга шынчы эвес

¹² «Мени Эфрем меге-биле, израиль чон – авыяас чоруу-биле бүзээлеп алган; Иудея шынчы ыдыктыг Бурганындан аза берген».