Осия 10 - Ыдыктыг Библия

Хаанның база дүрзү-бугажыктың төнчүзү

¹ Израиль – чечектелген виноград сывы, ол хөй чимис берип турар; ооң чимизи көвүдээн тудум, улам хөй өргүл бедигээштери тудуп аар, ооң чери эки болган тудум, даш көжээлерин каастаары дам баар.

² Израильчилерниң сеткил-чүрээ Дээрги-Чаяакчыга шынчы эвес, ол кем-буруузу дээш, олар кеземче алыр: Дээрги-Чаяакчы оларның өргүл бедигээштерин үреп кааптар, даш көжээлерин чуура шавар.

³ Израильчилер ынчан: «Бисте ам хаан чок-тур, Дээрги-Чаяакчыдан-даа кортпайн турган болгай бис. Хаан турар-даа болза, ол биске кандыг ажык-дузалыгыл?!» – дижир.

⁴ Олар хоозун сөстер чугаалап, меге даңгырак берип, өске чоннар-биле эвилелдежип турарлар, андазын чарган черде үнген хоран оът дег, чөптүг шииткелди хажыдып турарлар.

⁵ Самарияның чурттакчылары Бет-Авенде дүрзү-бугажыкка мөгеер дээш барып турар; ол дүрзүге мөгеер чон-даа, ооң өөрүп турган бараалгакчылары-даа ол дээш кажыыдап, ыглажыр. Чүге дээрге дүрзүнүң каас-чаражын чок кылып каар,

⁶ ооң бодун Ассирияже – өндүр улуг хаанга белек кылдыр – алгаш баар; Эфрем бак атка кирер, бодунуң кара сагыштыг бодалының ужун Израильдиң ады баксыраар.

⁷ Самарияның хааны, сугда салдаан чарты дег, чиде бээр.

⁸ Бет-Авенде мөгейиишкин кылыр бедик черлерни – израиль чоннуң бачыт үүлгедип турар черлерин үреп бузуп кааптар. Израильчилерниң өргүл бедигээштеринге тенниг үнүштер биле бок сиген үнүп кээр; олар дагларга: «Бисти дуглай дүжүңер!» – деп, тейлерге: «Бисче кээп дүжүңер!» – деп чанныр.

⁹ «Израиль, Гиваның үезинден бээр бачыт үүлгедип келген сен; израильчилер ол хевээр артып калган; Гивага шак ол бак сагыштыг улусту дайын таварбас бе?

¹⁰ Израильчилерни күзээним ёзугаар кезедир мен, өске чоннар оларга удур чыглып кээр, ынчан ийи кемниг херээ дээш, олар хүлүттүрүп аар.

¹¹ Эфрем – өөредип каан, тараа бастырарынга ынак инек-тир, ооң быжыг мойнунга хомутту Мен Бодум кедирер мен; Эфремни мунар мен, Иудея – чер аңдарар, Израиль – чер илииртээр.

¹² Чөптүг-шынныг чорукту бодуңарга тарып алыңар – энерелди ажаап аар силер; кур черни аңдарыңар, чүге дээрге Дээрги-Чаяакчыже чүткүүр үе келген-дир – Ол чедип келгеш, шын шииткелди силерже чагдырар.

¹³ Бузутту болбаазыраттыңар, оон кем-буруу ажаап алгаш, мегениң дүжүдүн чип алдыңар, чүге дээрге бодуңарның орууңарга, эңдерик аг-шерииңерге идегеп турдуңар.

¹⁴ Сээң чонуңга удур чаа-дайын үнер, Салманның Бет-Арбел хоорайны тулчуушкун үезинде үреп бускаш, аваларны ажы-төлү-биле катай чылча октап-шывадап турганы дег, сээң бүгү шивээлериңни үреп бузуп каар!

¹⁵ Үүлгеткен кедергей бузудуңар дээш, Вефилдиң чурттакчылары силерни ынчаар бак аажылаар».