Наум 2 - Ыдыктыг Библия

Ниневияның буураары

¹ Ниневия, узуткакчы сеңээ удур көдүрлүп тур. Шивээлериң камгала, орукту таңныылда, бодуңну быжыглап, бүгү күжүң чыып ал.

² Дээрги-Чаяакчы Иудеяның ат-алдарын, Израильдиң алдар-адын эгиткени дег, хоозурадыкчылар оларны ээнзиредип, оларның виноград шөлдерин узуткап каапкан-даа болза, катап тургузар.

³ Дайзынның дайынчыларының дозуг-камгалалдары кызыл өңнүг, ооң бүгү шериглери хүрең-кызыл хептерлиг. Дайынчы тергелерни тулчуушкунга белеткээн хүнде оларның демир кезектери чайынналган, аъттар девиржип чүткээн.

⁴ Дайынчы тергелер хоорайның кудумчулары, шөлдеринде каңгырадыр халыткан. Олар чалбыыш дег чайынналып турар, чаңнык дег кызаңнажып турар.

⁵ Оларның хааны шилиттинген дайынчыларны чыып аар, а олар кел чыткаш-ла, тептиге бээр. Олар хоорай ханазынче далаш-биле халдап кээрге, бүзээлелдиң чепсек-херекселдерин белеткеп каан болур.

⁶ Хем чанында хаалганы дайзыннар ажыдыптар, хаанның ордузу буступ каар.

⁷ Доктааткан чүүл бо-дур: Ниневияның чонун үндүр сывыртап, тудуп алгаш баар. Ооң кул херээженнери көге-бугалар ышкаш човууртап, баштарын шаштынар.

⁸ Ниневия эрте шагдан бээр долу суглуг хөөлбек дег турган, ол суг ам куругландыр үндүр агып-ла турар. «Туруңар! Доктааңар!» дээрге-даа, эглип кээр кижи чок.

⁹ Мөңгүнден үптеңер! Алдындан үптеңер! Шыгжамырларда янзы-бүрү эртине-байлактың курлавыры төнчү чок.

¹⁰ Ниневия үптеттирген, ээнзиреп база хоозурап калган. Кортканындан улустуң чүректери даамчырап, дискектери сириңейнип, эъди аарып, арыннары агарып турар.

¹¹ Арзылаңнар ижээни дег хоорай ам кайыл? Ол хоорайга эр-кыс арзылаңнар чоруп, төлдерин чемгерип турган, оларның төлдерин аңаа кым-даа коргутпайн турган.

¹² Ниневия, сен болза төлдерин тоттурар дээш олчазын үзерлеп турган, кыс эжинге чиш боой тудуп берген арзылаң дег-дир сен. Олчазы-биле куйларын, чижи-биле – ижээнин долдуруп алган арзылаң дег-дир сен.

¹³ «Мен сеңээ удур мен! – деп, Аг-шериглиг Дээрги-Чаяакчы медеглээн. – Мен сээң дайынчы тергелериңни хуюкталдыр өрттедиптер мен, хылыш сээң арзылаңчыгаштарыңны кыргып-хыдыыр. Чер кырынга сеңээ олча арттырбас мен, сээң элчиннериң үнү моон соңгаар дыңналбас».