Михей 5 - Ыдыктыг Библия

Вифлеемге төрүттүнер ужурлуг чагырыкчы

¹ Аг-шериглиг хоорай, аг-шерииңни белеткеп ал, бис бүзээлеттирип алган-дыр бис. Израильдиң баштыңы чаагынче шыкпыыш-биле соктурар-дыр.

² «А сен, Вифлеем-Эфрата, Иудеяның төрел бөлүктериниң аразында чөгенчиг суур-даа болзуңза, Израильдиң чагырыкчызы апаар кижи сенден үнүп, Мээңии боор-дур. Ооң ызыгууру эрте-бурун шагда, үе-дүпте-ле укталган-дыр».

³ Бурган израиль чонну кезек үеде кааптар. А иштиг херээжен демги чаш төлдү божуп аарга, израиль чонче оларның арткан ха-дуңмазы ээп кээр.

⁴ Израильдиң чагырыкчызы туруп келгеш, коданын Дээрги-Чаяакчының күжү-биле, бодунуң Бурганы Дээрги-Чаяакчының алдарлыг ады-биле кадарар. Чон ынчан айыыл чок чурттаар, чүге дээрге чагырыкчының өндүр ат-алдары чер-делегейниң ужу-кыдыынга чедир нептерээр.

⁵ Чагырыкчы чонга амыр-тайбыңны хайырлаар. Бистиң чуртувусче ассирийлер кирип келгеш, ордуларывысты таптаар болза, оларга удур чеди азы сес баштыңчыны көдүрер бис.

⁶ Олар Ассирияның черин хылыш-биле чагырар, Нимродтуң черин хынындан ужулган хылыш-биле чагырар. Бир эвес ассирий аг-шериг чуртувустуң кызыгаарын үреп кирип кээр болза, чагырыкчывыс бисти Ассириядан камгалаар.

⁷ Израиль чоннуң артынчызы хөй чоннар аразынга Дээрги-Чаяакчының дүжүргени шалың, оът-сигенде элбек чаъс-чайык суу дег боор; олар улуска идегевес, кижи амытанга ынанмас.

⁸ Израиль чоннуң артынчызы өске чоннар аразынга, хөй аймактар аразынга черлик аң-мең аразында арзылаң дег, кодан хойлар аразында аныяк арзылаң дег болур – ол халып үнгеш, оларны кемдедип, үзе-чаза тыртар, кым-даа оон адырып шыдавас.

⁹ Сээң холуң дайзыннарыңга удур көдүрлүр, сээң бүгү өжээтеннериң кырдырып аар.

¹⁰ «Ол хүн сээң аъттарыңны узуткап, дайынчы тергелериңни үреп каар мен – деп, Дээрги-Чаяакчы медеглээн. –

¹¹ Сээң чериңде хоорайларны узуткап, бүгү шивээлериңни үреп бузуп каар мен.

¹² Караң көрнүр чорууңну узуткап каар мен – чонуңнуң аразынга төлгелээр улус артпас.

¹³ Сээң дүрзү-бурганнарыңны, ыдыктыг көжээлериңни узуткап каар мен – бодуңнуң холуң-биле кылып алган чүүлдериңге моон соңгаар мөгейбес сен.

¹⁴ Ашера бурганга тураскааткан адагаштарны тура тыртып, сээң хоорайларыңны үреп бузуп каар мен.

¹⁵ Мени тооп дыңнавайн барган чоннарга килеңнеп, ажынып-хорадап, олардан өжээн негээр мен».