Михей 3 - Ыдыктыг Библия

Төлеп чок чагырыкчылар болгаш бүдүү билирлер

¹ Мен ынчан: «Иаковтуң салгалының баштыңнары, израиль чоннуң чагырыкчылары, дыңнаңар! Чөптүг шииткелди билир ужурлуг эвес силер бе?

² А силер – буянны көөр хөңнү чок, бузутка ынак, кижилерниң кежин союп, эъдин сөөгүнден шылып турар улус-тур силер;

³ мээң чонумнуң эъдин чип, кежин соя тыртып, сөөктерин сыйып, чанчарылдыр үүрмектеп турар, пашче каар дээн дег, эъдин доорап турар улус-тур силер!» – дээн мен.

⁴ Үе кээрге, олар Дээрги-Чаяакчыны кыйгырып, дуза дилээр, а Ол харыылавас. Ол үеде Дээрги-Чаяакчы олардан үүлгеткен бузуду дээш хая көрнү бээр.

⁵ Дээрги-Чаяакчы мынча дээн: «Мээң чонумну будулдуруп турар бүдүү билирлерге хамаарыштыр. Силерни чемгерер улуска амыр-тайбың медеглээр-дир силер, а аъш-чем бербес улуска кыжанып, дайын чарлаар-дыр силер.

⁶ Ол дээш, силерни көстүүшкүннер чок дүн сыырыптар, өттүр билген медеглелдер чок дүмбейге бүргеттирер силер. Бурганның медээчилери дирткен силерниң кырыңарда хүн ажа бээр, чырык хүн силерге караңгылай бээр.

⁷ Өттүр көөр улус ыядып каар, бүдүү билирлерниң ады баксыраар; силер шупту аксыңар хаап аар силер, чүге дээрге Бурган силерге харыылавас».

⁸ А мен болза Дээрги-Чаяакчының Сүлдези берген күшке, шынныг чорукка болгаш дидим чорукка бүргеткен мен, Иаковтуң салгалынга – ооң кемниг херээниң дугайында, израиль чонга – ооң бачыдының дугайында чугаалаар мен.

⁹ Иаковтуң салгалының баштыңнары, израиль чоннуң чагырыкчылары, мону дыңнаңар! Силер чөптүг шииткелди херекке албайн, бүгү шын чүвени хажыдып турар-дыр силер.

¹⁰ Силер – Сионну өлүрүүшкүн-биле, Иерусалимни кемниг үүлгедиишкин-биле тудуп тургузуп турар улус-тур силер!

¹¹ Иерусалимниң баштыңнары хээли ап, шиидип турар-дыр, Бурганның бараалгакчылары төлевир ап, өөредип турар-дыр, Бурганның медээчилери акша-мөңгүн ап, төлгелеп турар-дыр. Ооң кадында Дээрги-Чаяакчыга даянып: «Дээрги-Чаяакчы бистиң аравыста эвес чүве бе? Бисти айыыл-халап таварбас!» – дижирлер.

¹² Ынчангаш силерниң хайыңар-биле Сионну шөл ышкаш аңдарып кааптар, Иерусалим бузундулар оваазы апаар, Бурганның өргээзин туткан даг арга-ыяш үнген чер апаар.